भांगरभूंय | प्रतिनिधी
चिंचणी देवसू ग्रामसभेंत घेतलो म्हत्वाचो थाराव
मडगांव : चिंचणी देवसू ग्रामसभा आयज सरपंच फ्रँक व्हिएगस हांचे अध्यक्षते खाला जाली. ह्या वेळार बिगर गोंयकारांक लागून वाडिल्ल्या त्रासांचेर बरीच चर्चा जाली. हेच फाटभूंयेर आयज एक म्हत्वाचो थाराव ग्रामसभेंत घेतलो. सुरक्षिततायेचे नदरेन घर धनयांनी बिगर गोंयकार आशिल्ल्या बिराडकारांचें व्हॅरिफिकेशन जाले उपरांतूच कुडींत रावपाची परवानगी दिवची, असो थाराव आयज चिंचणी देवसू ग्रामसभेंत जालो.
गांवांत बिगर गोंयकार वाडिल्ल्यान गांवच्या लोकांचे सुरक्षिततायेचो प्रस्न निर्माण जाला. कांय घर धनी पयलीं आपलो कुडी बिराडाक दितात आनी ताचे उपरांत तीन-चार म्हयन्यांनी पुलीस व्हॅरिफिकेशना खातीर वतात. हें थळाव्यांच्या सुरक्षिततायेचे नदरेन तशेंच कायदो आनी सुवेवस्थेचे नदरेन धोक्याचें थारपाक शकता. हाका लागून पुलिसांच्या व्हॅरिफिकेशना उपरांतूत घर धनयांनी आपली कूड बिराडाक दिवची. पयलीं तांच्या व्हौरिफिकेशना खातीर अर्ज करचो आनी उपरांत कुडींत रावपाची परवानगी दिवची, असो थाराव घेतलो.
चिंचणी देवसू गांवांत सेगीत लायट वचपाची समस्या आसा. वीज खात्या कडेन म्हयन्याचे म्हयने मागणी करूनय गरजेच्या कर्मचार्यांची नेमणूक जायना. एका वाहना सयत चार कर्मचार्यां कडल्यान चार पंचायत वाठारांतलो वीज कारभार पळयतात. तांचेरूय कामाचो ताण येता. हे समस्येचेर कायमचे उपाय काडपाक जमनी पोंदच्यान सरयो घालपाचो पर्याय आसा, अशें ग्रामस्थांनी सांगलें.
हाचेर राज्य सरकारक जमनी पोंदच्यान लायटीच्यो सरयो घालपा खातीर पत्र बरयलां. बेगीनूच हाचे अंमलबजावणी जातली. वीज खात्याकडेनूय ह्यो समस्या मांडिल्ल्याचें सरपंच फ्रँक व्हिएगस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
