भांगरभूंय | प्रतिनिधी
1 डिसेंबर सावन अंमलबजावणीः अधिसुचोवणी जारी
भांगरभूंय । प्रतिनिधी
पणजीः पुलिसांक बिराडकारांची म्हायती दिनाशिल्ल्या घर धनयांक आतां 1 डिसेंबर सावन 10 हजार रुपयांचो दंड भरचो पडटलो. गोंय बिराडकार पडताळणी कायद्याची अंमलबजावणी 1 डिसेंबरा सावन सुरू जातली. अंमलबजावणेची तारीख निश्चीत करपी अधिसुचवणी गृह खात्या वतीन जारी केली.
लोकांचे सुरक्षितताये खातीर पुलिसांनी बिराडकारांची तपासणी मोहीम सुरू केल्या. आतां मेरेन सुमार 2 लाख घरांची बिराडकारां खातीरची तपासणी पुराय जाल्या. जे घर धनी बिराडकारांची म्हायती आनी कागदपत्रां पुलिसांक दिनात, तांकां 10 हजार रुपयां मेरेन दंडाची तरतूद ह्या कायद्यांत आसा. घर धनयांनी बिराडकारांच्या वळखपत्रां सयत गरजेची म्हायती फॉर्माचेर भरून लागसारच्या पुलीस स्टेशनांत दिवची, अशी सुचोवणी सरकारान पयलींच केल्या. सरकारान कायदो सुवेवस्था राखपा वांगडा गुन्यांवांचो सोद घेवप शक्य जावचें, ह्या हेतान हो कायदो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
