भांगरभूंय | प्रतिनिधी
.मडगांव : बिट्स पिलानी कॅम्पसांतले घडणुकेक लागून शिक्षणीक संस्थांतल्या वाडपी ड्रग्साच्या धोक्याचेर आमदार क्रूझ सिल्वा हांणी हुस्को उक्तायला. तांणी दक्षीण गोंय पुलीस अधीक्षक टिकम सिंग वर्मा हांकां निवेदन दिवन ह्या प्रकरणांत बेगोबेग कारवाय करपाची मागणी केली.
आम आदमी पक्षाच्या शिश्टमंडळान पुलीस अधीक्षकांची भेट घेवन तांकां सांगलें, बिट्स पिलानी कॅम्पसांत वर्सभरांत पांच विद्यार्थ्यांक मरण आयलें. तांतल्या हालींच मरण आयिल्ल्या ऋषी नायर हाच्या वैजकी अहवालांत ताच्या शरिरांत ड्रग्स सांपडिल्ल्याचें समजता. ही गंभीर परिस्थिती शिक्षणीक संस्था आनी तांच्या आशिकुशीक घुवळे वखदांचो अनियंत्रीत प्रसार जाल्ल्याचें समजता.
हेच फाटभूंयेर, आमदार सिल्वा हांणी शिक्षणीक संस्थां लागसारच्या ड्रग्ज पुरवण करप्यांक सोदून काडून तांचेर कारवाय करपाची, तशेंच विद्यार्थ्यांची गर्दी आशिल्ले सुवातेर तपासणी वाडोवपाची मागणी केल्या. तांणी पुलिसां खातीर ड्रग्सा विशीं म्हायती दिवपी वेवस्था निर्माण करपाची सुचवणीय केली.
पुलीस अधीक्षक टिकम सिंग वर्मा हांणी दक्षीण गोंयांत घुवळे वखदां विरोधी मोहीम आनीक खर करपाचें आस्वासन ह्या वेळार दिलें. विद्यार्थ्यां मेरेन घुवळे वखदां पावचीं ना, हाची जतनाय घेतले. शाळा आनी महाविद्यालयांच्या आशिकुशीकच्या वाठाराचीय तपासणी करतले, अशें तांणी स्पश्ट केलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
