भांगरभूंय | प्रतिनिधी
वास्को: सांकवाळ-झुआरीनगरच्या बिट्स पिलानी गोवा कॅम्पसांत बिरेस्तारा (ता. २५) बॉंब दवरिल्ल्याचो ई-मेल आयिल्ल्यान बरोच बोवाळ निर्माण जालो. तशेंच तपासा वेळार हो ईमेल फटींग आशिल्ल्याचें सिद्ध जाल्ल्यान सगल्यांनी सुटकेचो उस्वास घेतलो. ह्यान पयलींय त्याच भागांतल्या मावंट लिटेरा हायस्कुलांत बॉंब दवरिल्ल्याचो ई मेल आयले उपरांत विद्यार्थी, शिक्षक आनी हेरां मदीं भंय निर्माण जाल्लो. तेन्नाय तो ईमेल फटींग आशिल्ल्याचें सिद्ध जाल्लें.
बिट्स पिलानी गोवा कॅम्पसांत बॉंब दवरिल्ल्याचो ई मेल मेळिल्ल्यान वेवस्थापनान उपाय येवजण म्हणून सगल्या विद्यार्थ्यांक बेगोबेग मेकळे सुवातेर व्हेलीं. हे विशीं वेर्णा पुलिसांक म्हायती दिली. पुलीस रोखडेच थंय पावले. तांचे फाटल्यान बॉंब निकामी करपी पंगड, सुण्यांचो पंगड थंय पावलो. तांणी सगल्या भागांची तपासणी केली. तरी बॉम्ब खंयच मेळूंक ना. हाका लागून सगल्यांक समाान जालें. हे विशीं वेर्णा पुलिसांनी अनवळख्यां आड गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
