भांगरभूंय | प्रतिनिधी
पुलीस अधीक्षक वर्मा : ड्रग्ज विशीं सगले वटेन तपास सुरू
मडगांव : डिसेंबर 2024 सावन आतां मेरेन बिट्स पिलानी कॅम्पसांत पांच विद्यार्थ्यांक मरण येवपाच्यो घडणुको घडल्यात. मात पयलींच ऋषी नायर ह्या विद्यार्थ्याच्या मरण प्रकरणांत वैजकी अहवालांतल्यान शरीरांत ड्रग्स मेळ्ळे. हे ड्रग्ज विद्यार्थ्याक कशे मेळ्ळें? तांणी ते कशे आनी केन्ना घेतले? अश्या सगल्या वटांनी तपास चालू आसा, अशें दक्षीण गोंय पुलीस अधीक्षक टिकमसिंग वर्मा हांणी सांगलें.
कॅम्पसांत ड्रग्ज मेळटात जाल्यार कारवाय करतले. दक्षीण गोंयच्या शिक्षणीक संस्थांच्या वाठारांत ड्रग्ज, सोरो वा हेर खंयचोय बंदी घाल्लो जिन्नस सांपडल्यार कारवाय करतात. पुलीस आपलें काम करतात. खंयचोय मनीस शिक्षणीक संस्थेच्या वाठारांत, भायर वा आशिकुशीक खंयच्याय विद्यार्थ्यांच्या संपर्कांत आसा आनी तो बेकायदेशीर बंदी आशिल्ल्या गजालींची पुरवण करता अशें समजल्यार ताचेर खर कारवाय जातली. रॅन्ड्रोक्स ह्या मशिनाचेर रक्ताची तपासणी करतात. ते तपासणेवेल्यान ऋषी नायरच्या शरीरांत ड्रग्जचे अंश आशिल्ल्याचें दिसून आयलें.
शिक्षणीक संस्था, शेजारी आस्थापनांची जातली तपासणी
शाळा, महाविद्यालयां आनी हेर शिक्षणीक संस्थांच्या आशिकुशीक आशिल्लीं दुकानां, आस्थापनां वा कांय दुबावीत मनीस भोंवतना दिसल्यार तांची चवकशी करता. कांय दिसां पयलींच शाळो, महाविद्यालयां लागसारच्या दुकानांचे तपासणे खातीर मोहीम राबयल्ली. ही मोहीम आनीक खर करतले, अशें अधीक्षक वर्मा हांणी सांगलें.
बिट्स पिलानी वाठारांत अचकीत तपासणी सुरु
दक्षीण गोंयच्या हेर शिक्षणीक संस्थांच्या वाठारांत जर ड्रग्साची पुरवण जाता जाल्यार ताचेर कारवाय जातली. हे विशीं कसलीय म्हायती मेळ्ळ्यार सुरक्षारक्षक, सुपरवायझर हांचे कडेन चवकशी करता आनी दुबावीत मनशाक ताब्यांतूय घेतात. बिट्स पिलानी कॅम्पसांत गरजेची सुरक्षा दवरल्या. अचकीत तपासणी जाता. थंयच्या सुरक्षारक्षकांकूय कशे तरेन तपासणी करची हाची म्हायती दिल्या. थळावे पुलीस तांच्या संपर्कांत कायम आसात. शिक्षणीक संस्थांनी ड्रग्साची पुरवण जाता जाल्यार ती आडावपाक गरजेचे उपाय केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
