भांगरभूंय | प्रतिनिधी
पणजी : बिट्स पिलानीच्या गोंय कॅम्पसाच्या मुखेल प्रवेशदारा सामकार एका दुचाकी चालकाक ट्रकान चिड्डल्ल्यान ताका जाग्यारूच मरण आयलें. प्रवीण शिरोलकार (३२) अशें मरण आयिल्ल्या तरणाट्याचें नांव. तो बायणा, वास्को रावतालो. मुळचो कोल्हापुरचो आशिल्लो प्रवीण वेर्णा उद्देगीक वसणुकेंतले ’सिप्ला’ कंपनींत कामाक आशिल्लो. कामाचेर वतना काळान ताचेर घालो घालो.
ह्या अपघाता विशीं चड म्हायती प्रमाण, प्रवीण आपले दुचाकीवेल्यान वेर्णाचे दिकेन वतालो. तेन्नाच एकेच दिकेन ट्रक आनी एक टँकरूय प्रवास करतालो. थंय हाजीर आशिल्ल्या एकल्यान दिल्ले म्हायती प्रमाण, हीं दोनूय वाहना वतना प्रवीण हांणी ओव्हरटेक करपाचो यत्न केलो. मात ह्या यत्नांत ताचो दुचाकीवेल्यान नियंत्रण सुटलें आनी तो सरळ ट्रकाच्या फाटल्या टायरा पोंदा गेलो. ट्रकाचे टायर प्रवीणाचे तकलेवेल्यान गेल्ल्यान ताका आक्ताक मरण आयलें.
अपघात जाले उपरांत ट्रक चालकान वाहना थाराय नासतना घडणुके सुवातेवेल्यान पळ काडलो. हाका लागून कांय काळ महामार्गार ताणाचें वातावरण निर्माण जाल्लें. मात कांय वेळार संबंदीत ट्रक लागून स्वता वेर्णा पुलीस स्टेशनांत शरण आयलो. पुलिसांनी बेगोबेग ट्रक ताब्यांत घेतलो. ट्रक चालकाची वळख आनी हेर गजाली आजूनय मुखार येवंक ना. पुलीस हे विशीं तपास करतात.
वेर्णा पुलिसांनी पंचनामो केलो. शिरोलकार हाची कूड सध्या पोस्टमार्टमा खातीर धाडल्या.
महामार्गार जड वाहनांच्या वेगाचेर आनी येरादारींत शिस्त नाशिल्ल्यान अशे तरेच्या अपघातांनी वाड जाल्या, अशी प्रतिक्रिया थळाव्या नागरिकांनी उक्तायल्या. वेर्णा पुलीस ह्या प्रकरणाचो अदीक तपास केल्ल्यान, नेमकी चूक कोणाची आशिल्ली हाचो सोद सीसीटीव्ही फुटेजच्या आदारार पुलीस घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
