भांगरभूंय | प्रतिनिधी
बिग डॅडीन फुलराणी किनळेकार हिका मोटाराचेर चलपी व्हीलचेर भेटयल्या. दिव्यांग व्यक्ती विशीं आशिल्ले आदराचेर भावनेन बिग डॅडीच्या धनयांनी पेडण्यां रावपी फुलराणीक मजतीचो हात दिलो. हात- पांय नासतना जल्मल्ल्या फुलराणीक हालींच ही व्हीलचेर भेटयली. हे कृतीन फुलराणीच्या जिवितांत बदल घडोवन हाडलाच पूण तिच्या काळजांत उपाट खोस, उमेद निर्माण जाल्या.
फुलराणीचो हो प्रवास निर्धाराचो. आवय- बापायच्या मोगान आनी आदारान तिका उर्बा मेळ्ळी. तिची स्थिती कळटकच तांकां सुरवेक धक्को बसलो तरी तिच्या आवय- बापायन केन्नाच हार मानली ना आनी तिचेर निसुवार्थी मोग केलो. अर्थीक संघर्श आसून लेगीत फुलराणीक पोरण्या गोंयांतल्या सेंट झेवियर अकादेमींत शिक्षण मेळटलें, हाची खबरदारी तांणी केली. थंय तिका भरतकाम आनी शिंवपाची आवड निर्माण जाली. ही कुशळटाय तिणें उल्लेखनीय प्रतिभेन आत्मसात केली.
बारावी पुराय केले उपरांत फुलराणीन आपल्या जिविताचीं तीन वर्सां तेच अकादेमींत बालवाडी भुरग्यां खातीर तात्पुरती शिक्षक म्हणून काम करपाक ओंपलीं. तिची सकारात्मक वृत्ती आनी जिविता विशींची उमेद तिच्या भोंवतणच्या लोकांक प्रेरणा दिवपी थारल्या.
मोटराचेर चलपी व्हीलचेराचें जिवितांत अचकीत आगमन फुलराणी खातीर सपन साकार जावपा परस उणें ना. व्हीलचेराक लागून मेळपी स्वातंत्र्य आनी स्वावलंबनाची तिका खूबदां इत्सा आशिल्ली, पूण ती साकार जातली अशी तिणें केन्नाच चिंतूंक नाशिल्लें. हे अविश्वसनीय भेटेक लागून तिका नवे मार्ग उक्ते केल्यात, ताका लागून तिका सहजतायेन आनी आत्मविस्वासान संवसारांत भोंवपाक सशक्त जाल्या.
फुलराणी समाजसेवक फरीदा विशाल बांदेकार हांचे उपकार मानता. तिच्या करुणामय स्वभावाक लागून आनी फुलराणी सारकिल्ल्या लोकांक मजत करपाचें तिचें समर्पण हाका लागून फरिदाचें राज्यभर नांव जालां. ते भायर फुलरानी बिग डॅडीच्या धनयांचें काळजा थावन उपकार मानता, जांचे प्रायोजकतेन मोटराचेर चलपी व्हीलचेर मेळोवप शक्य जालें. तांच्या ह्या योगदानान फुलराणीचें जिवीत समृद्ध जालांच पूण कॉर्पोरेट समाजीक जापसालदारकेच्या बळग्याचेंय दर्शन जालां. व्यक्तींच्या जिवितांत सकारात्मक परिणाम करपाची तांची वचनबद्धताय तोखणायेक पात्र आसा आनी हेरांक प्रेरणादायक आसा.
रोजगार सोदपाच्या प्रवासाक सुरवात करतना व्हीलचेराक लागून नव्यान मेळिल्ली हालचाल आनी स्वातंत्र्य फुलराणीक संदीचें दार उक्तें करतलें, हातूंत दुबाव ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
