भांगरभूंय | प्रतिनिधी
आमदार रेजीनाल्ड मुख्यमंत्र्यांक मेळटले
पणजी : सेगीत पडपी पावसाक लागून भाताच्या शेतांत उदक सांठून उरपाक लागलां. तशें सुपारीय गळपाक सुरू जाल्या. कांपणी केल्ल्या भाताक कोंब येवपाक लागल्या. वताची गरज आसतना पावसान हाजेरी लायिल्ल्यान शेतकारांच्या तोंडांतलो घांस सुटलो. शेतकारांक बेगोबेग लुकसाण भरपाय मेळची म्हूण आपूण यत्न करतलों. मुख्यमंत्र्या कडेनूय मागणी करतलों अशें आमदार अलेक्स रेजिनाल्ड हांणी सांगलें. दिवाळे पयलींच बिगरमोसमी पावस सुरू जालो. फाटलो शुक्रार, शेनवार पावसाचें प्रमाण चड आशिल्लें. उपरांत पावसान कांय काळ विसव घेतिल्ल्यान कांय प्रमाणांत थाकाय मेळिल्लो. तशेंच मंगळार रातच्यान पावसान नेट धरलो. बुधवारा सकाळीं सगले कडेन घोग्यांनी पावस झडलो.
चडशा भात शेताची कापणी जाल्या. पावसाक लागून भाताचीं कणसां कुसून तीं कुसपाक लागल्यांत. उण्या, चड प्रमाणांत सगल्याच वाठारांत भातशेतीचें लुकसाण जालां. शेतकरी आधारभूत निधी खाला हॅक्टरी ४० हजार प्रमाण शेतकारांक लुकसाण भरपाय दितले. अधिकार्यांनी पळोवणी केले उपरांतूच लुकसाणेचें प्रमाण कळटलें, अशें कृषी संचालक संदीप फळदेसाय हांणी सांगलें.
चड लुकसाण भरपाय दिवची
सध्या ४ रूपया प्रती चौरस मीटर (हेक्टरी ४० हजार) प्रमाण लुकसाण भरपाय दिता. हें प्रमाण सामकेंच उणें आसा. लुकसाण भरपायेचे किमतींत ६ रूपया प्रती चौरस मीटर इतली वाड करपाची मागणी आमदार अलेक्स रेजिनाल्ड हांणी केली. कुडतरी मतदारसंघांत शेतकारांचो आंकडो व्हड आसा. लागीं लागीं सगल्याच शेतकारांचें लुकसाण जालें. बेगोबेग मजत मेळची म्हणून हांव मुख्यमंत्र्यांक मेळटलों, अशें रेजिनाल्ड हांणी सांगलें.
सुपारेकूय फटको
अंदूं पावसाचें प्रमाण बरें आशिल्लें. हाका लागून सुपारेचें पीक समाधान करपा सारकें आशिल्लें. मात आतां पावसाक लागून सुपारी गळपाक सुरवात जाल्या. वताची गरज आसतना सेगीत झडपी पावसाक लागून लुकसाण जाता, अशी म्हायती सत्तरीचे बागायतदार अशोक जोशी हांणी दिली. ज्या बागायतदारांनी किटकनाशकांचो फवारो मारूंक ना, तांकां व्हडा प्रमाणांत फटको बसतलो अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
