भांगरभूंय | प्रतिनिधी
दिवचलः फाटल्या कांय दिसां सावन दिवचल म्हाला सयत गोंयभर चालू आशिल्ल्या पावसाक लागून खूब लुकसाण जालें. व्हाळवाट न्हंयेत हुंवारा सारकी परिस्थिती निर्माण जाली. पूण शेनवारा दनपारां उपरांत परिस्थिती पुरायपणान नियंत्रणांत आयली आनी तात्पुरतो धोको टळ्ळो.
सकाळीं व्हाळवाट आनी दिवचल न्हंयेचे पंपिंग सुरू केल्लें. अंजुणे धरणाच्या उदकाची पातळी 93 मीटरां वयर वाडिल्ल्यान धरणाची चारुय दारां उगडून उदक सोडलां.
साबार वाठारांनी उदक भरिल्ल्यान लोकांक त्रास सोंसचे पडलें. सांखळे गटारांतल्यान उदक बाजारांत पावपाची शक्यताय आशिल्ल्यान वेळार पंपिंग सुरू करून हुंवाराची परिस्थिती नियंत्रणांत हाडली.
सांखळे व्हाळवाट न्हंयेची पातळी सकाळीं साडेतीन मीटरां वयर वाडून हुंवारा सारकी परिस्थिती निर्माण जाली. दिवचल न्हंय सुमार साडेतीन मीटर पातळेचेर पावली, पूण दनपारां उपरांत पावस उणो जालो. आमठाणे धरणांत 49 मीटर मेरेन उदक भरिल्ल्यान कांय दिसांनी विअरांतल्यान अतिरिक्त उदक सोडपाची शक्यताय आसा. उदका संसाधन खात्याचे सगले अधिकारी परिस्थितीचेर नदर दवरतात. मामलेदार शैलेंद्र देसाय हांणी तलाठी वरवीं लुकसाणीचो नियाळ घेवपाचे आदेश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
