भांगरभूंय | प्रतिनिधी
भांगरभूंय । प्रतिनिधी
पणजीः बाल भवन प्रशासन आनी प्रशिक्षकां मदीं बेरेस्तारा केस्तांव पेटलें. बाल भवनान कारण दिनासतना डान्स क्लासी बंद करून भुरग्यांचेर अन्याय केला, असो आरोप प्रशिक्षक सुदेश साळगांवकार हांणी केला. जाल्यार बाल भवनाचे संचालक शशिकांत पुनाजी हांकां विचारल्यार तांणी सांगलें, हें कोफुसांव बाल भवनाचे आदले संचालक आनी अध्यक्षांच्या माथ्यार मारून आपणे कायद्या प्रमाण काम केलां, अशें रजांव दिलें.
निर्भय भव डान्स अकादमी आनी बाल भवन गोंयभर डान्स वर्ग घेतात. पणजे केंद्रांतूय डान्स वर्ग चलतात. दोन वर्सां जालीं बाल भवनाच्या भुरग्यांनी डान्स मळार राज्य, राष्ट्रीय आनी संवसारीक पांवड्यार नामना मेळयल्ली. जेन्ना बाल भवनाचे भुरगे नेपाळांत सर्त जिखिल्ले तेन्ना बाल भवनान भुरग्यांचो केंद्रीय श्रीपाद नायक हांचे हस्तुकीं भोवमान केल्लो, अशें प्रशिक्षक साळगांवकार हांणी सांगलें. पूण नव्यान नेमणूक जाल्ले संचालक शशिकांत पुनाजी हांणी आपल्या पदाचो गैरवापर करून 25 जूनाक पत्र काडून 3 जुसय मेरेन आमचे वर्ग बंद दवरपाक सांगलें. जेन्ना कारण विचारल्यार संचालका कडेन योग्य जाप नासली. अध्यक्षान आपल्याक तापयला म्हूण हो निर्णय घेतला अशेंण तो सांगतालो. मदीं मदीं मुख्यमंत्र्याचेंय नांव तो घेतालो, अशें साळगांवकार हांणी सांगलें.
आमी कलाकार, आमकां राजकारण कळना. संचालकान आपल्याक तांच्या कॅबिनांत
आपयलो आनी 50 हजार रुपया इतली लांच दी म्हूण आपल्याक खुणो करपाक लागलो. पूण आपणें ताचें कांयच कानामनार घेंवक ना. ते भायर भुरग्यांक प्रशिक्षणांच्या शुल्कांचो कांय वांटो म्हूण बाल भवनाक आतां मेरेन 60 हजार रुपया दिल्यात. ते भायर बाल भवना वांगडा आमचे कबलातीच्या कागदपत्राची फायल लेगीत गायब जाल्या, असो आरोप साळगांवकार हांणी केलो.
हे विशीं बालभवनाचे संचालक शशिकांत पुनाजी हांकां विचारल्यार तांणी हें सगळे आरोप भायरायले आनी आपणे केन्नाच कोणा कडल्यान लांच मागूंक ना, अशें स्पश्टीकरण दिलें.
आदले संचालक जावडेकर हांणी हे वर्ग सुरू करपाक मान्यताय दिवची हे खातीरचो प्रस्ताव अध्यक्षांक धाडिल्लो. पूण तांकां मान्यताय नासली तरी लेगीत हे वर्ग चालू उरताले. आपणे ह्या पदाचो ताबो घेतले उपरांत ह्या वर्गांक मान्यता ना हे दिसून आयलें आनी आपणे अध्यक्षाचे नदरेक हाडून दिलें, अशें स्पश्टीकरण गुणाजी हांणी दिलां. निर्भय भव दरेक भुरग्या फाटल्यान 500 रुपया बाल भवनाक दिताले. पूण हाका मान्यताय नाशिल्ल्यान अध्यक्षान हे वर्ग रद्द करपाक सांगले. सरकारान ही प्रक्रिया केल्या, आपल्या हातांत कांय ना. ते भायर बाल भवनाचे प्रशिक्षक डान्स वर्ग घेतात. पालकांक चड पयशे मोडून खाजगी डान्स वर्ग घेवचे परस बाल भवनाचे वर्ग घेवपाक शकतात, ताका लागून भुरग्यांचेर कसलोच अन्याय जायना, अशें गुणाजी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
