भांगरभूंय | प्रतिनिधी
बालरथांक लागून सरकारी शाळांनी शिकपी विद्यार्थ्यांचो आंकडो उणो जाला, अशें दिशिल्ल्यान हाचे मुखार अनुदानीत शिक्षणीक संस्थांक बालरथ दिवपाचे ना, असो निर्णय शिक्षण खात्यान घेतला. विद्यार्थ्यांनी आपल्या घरा पसून लागीं आशिल्ले शाळेंत शिक्षण घेवचें, असो केंद्र सरकाराचोय आदेश आसा. खरें म्हणल्यार हें योग्यूच. पूण, दुसरे वटेन पळयल्यार आपल्या भुरग्याक बऱ्यांतलें बरें शिक्षण दिवप, हो पालकांचो हक्क. ते खातीर ते तांच्या वा समाजाच्या मतान जी शाळा बरो निकाल दिता, जंय शिस्त आसा, जंय मेहनती शिक्षक आसात, तेच शाळेंत विद्यार्थ्यांक धाडटात. गोंयांत 4- 5 किलोमिटर पयसुल्ले शाळेंत वचून शिक्षण घेवपी पांचवे, सवे यत्तेचे विद्यार्थी आसात. ताचे खातीर तांकां बालरथ फायद्याक पडटाले. थोडे आपल्या भुरग्यांक खास रिक्षा वा व्हॅनीन धाडटात. मात, हाचे मुखार नवे बालरथ मेळचे नात. सध्या आसात, ते मोडल्यार शिक्षण संस्थांक स्वताच्या खर्चांत दुरुस्त करचे पडटले. खासदारांनी आपल्या निधींतल्यान बालरथ दिल्यार ताचें अनुदान संबंदीत शाळेक दितले. शिक्षण खात्याच्या ह्या निर्णयान रोखडेच सगले बालरथ बंद जातले अशें दिसता. नाजाल्यार तांचे दुरुस्ती खातीर पालकांच्या बोल्साक खार पडूं येता.
सध्या राज्यांत तिनशे परस चड बालरथ आसात. लागीं – लागीं सगल्यांक शाळांक ते दिल्यात, अशें म्हणल्यार जाता. तरीय कांय पालक- शिक्षक संघ बालरथ उणे पडटात, अश्यो कागाळी शिक्षण खात्या कडेन करपाक लागल्यात. मात हाचे मुखार बालरथांक ब्रेक लागतलो. कोरोना उपरांत वराराच्यो खूबश्यो बसी खाजगी भाडीं मारतात. थोड्यो सकाळीं आनी सांजच्योच वराराक धांवतात. बालरथ बंद जातकच ह्या खाजगी बसींक बरे दीस येवपाची शक्यताय आसा. कांय उच्च माध्यमीक शाळा, कॉलेजांक बालरथ दिवंक नात, थंय विद्यार्थी खाजगी वा कदंब बसींनी प्रवास करतात. उरिल्ल्यांक पालक स्वताच्या गाडयांनी पावयतात. चलून शाळेक वचपी विद्यार्थी खूब कमी आसतले.
दिल्लींत फाटीं केंद्रीय शिक्षण मंत्रालयान बसका घेतिल्ली. त्या वेळार एका राज्यान आपूण शाळांक बालरथाची सुविधा दिल्या, अशें सांगलें. ताचेर मंत्रालयान नाराजी उक्तायत केंद्राच्या आदेशाक पाळो दिवपाचे निर्देश सगल्या राज्यांक दिले. देखूनच शिक्षण खात्यान अनुदानीत शाळांक हाचे मुखार नवे बालरथ दिवप ना, असो निर्णय घेतला, अशें सरकाराचें म्हणणें. गोंयांत आदल्या तेंपार विद्यार्थी चलत शाळेंत वताले. तांकां पालक पावोवपाक, व्हरपाक येनाशिल्ले. शाळा शक्यतो लागीं आसताली. हालींच्या वर्सांनी मात बऱ्यांतली बरी शाळा सोदून पालक थंय आपल्या भुरग्यांक घालतात. देखून दरेका शारांत इंटरनॅशनल, युनिव्हर्सल… शाळा सुरू जाल्यात. थंय प्रवेशा वेळार घिट्टी पडटात. सकाळीं आठ वरांचेर सुरू जावन सांजवेळा चारांक सुटपी शाळा आसात. म्हणल्यार दनपरां शाळा सुटली काय घरा जेवन येवप वा थंयच टिफीन खावप आनी मागीर खास वर्ग, नाच, अभिनय, कला- संस्कृतीचे वर्ग, खेळ अशें खूब कितें शिकप. ह्योय शाळा पालकांक खूब आवडूंक लागल्यात. बालरथ बंद जातकच ह्या शाळांची मागणी वाडूं येता. कारण गोंयांत पयशांक पादिसेर पालक तशे उणेच. गांवातले लागींचे खाजगी वा सरकारी शाळेंत धाडपा बदला ते दुडू मोडून तांकां आपल्याक जाय तेच शाळेंत धाडटले. सगल्योच सरकारी शाळा तश्यो रिकामी नात. मात थंय शिकपी चडश्या विद्यार्थ्यांचे पालक हे गरीब, कनिश्ठ मध्यमवर्गीय गोंयकार आनी परप्रांतीय कामगार. कांय सरकारी शाळा मात बंद पडल्यात. अंदूं सात, तर फाटल्या 10 वर्सांत 135 सरकारी मुळाव्यो शाळा बंद पडल्यात. थोड्या शाळांनी 10- 12 वा ताचे परस उणे विद्यार्थी शिकतात. कांय काळा उपरांत मास्तर, गुरुजी, बाई हीं उतरांच शिक्षण मळा वयल्यान गायब जातलीं काय, अशी शक्यताय दिसपाक लागल्या. हें सगलें जावपाक बालरथ हेंच मुखेल कारण अशें शिक्षण खात्याक दिसता. मात, बालरथ बंद करून सरकारी शाळांतले विद्यार्थी वाडटले, हाची खात्री दिवप धाडसाचें थारतलें. वाठारातल्यो 1- 2 मुखेल शाळांनी आनी पालकांचें आकर्शण थारिल्ल्या आवडीच्या शाळांनीच हे विद्यार्थी वतले, असो अदमास आसा. कारण थंय शिकपी विद्यार्थीच हुशार, शिटूक, सादूर, अभ्यासू, अश्टताशी जाता असो पालकांचो समज आसा. आतां तो समज काय गैरसमज तें दरेकल्यान थारावचें.
बालरथाची दुरुस्ती, क्लीनर, ड्रायव्हराचो पगार फारीक करपाक सरकार शाळांक अनुदान दिता. हाचे मुखार तें मेळचें ना. मुळांत सगल्याच अनुदानीत शाळांची अर्थीक स्थिती बळिश्ट ना. हो बालरथाचो बंद करपाचो निर्णय अनुदानीत शाळांक धपको दिवपी थारतलो, काय पालकांक, तें रोखडेच कळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
