बालदिन

भांगरभूंय | प्रतिनिधी

भावंडांनो,
देशभरच्या भावंडांचे अपुरबायेचे ’चाचा’ थारिल्ले, तेंचपरी ‘आराम हराम है’ हो म्हामंत्र जगोवपी देशाचे पयले प्रधानमंत्री, शिल्पकार आनी भारतरत्न पंडीत जवाहरलाल नेहरू हांचो 14 नोव्हेंबराक जल्मदीस. हो दीस पुराय देशभर ‘बालदीन’ म्हूण मनयतात. ह्या निमतान देशांतल्या सगळ्या शाळांनी ल्हान भावंडां खातीर तरेकवार कार्यावळी जातात. भावंडांनो, तुमी ह्या कार्यावळींनी वांटो घेतलीं हें हांव जाणां. चाचा नेहरू म्हुणटाले की तुमी आमच्या देशाचे खांबे. तुमी सगळ्यांनी तांचे भशेन अश्टताशी जावप गरजेचें. ते खातीर तुमी तुमच्या शिक्षकां कडल्यान, पालकां कडल्यान गिन्यान मेळोवप गरजेचें. गिन्यान मेळोवन तुमी खूब व्हड जायात हां.
भावंडांनो, बालदिनाच्या निमतान तुमकां चाचा नेहरूंची थोडी म्हायती दितां. देशाची स्वातंत्रताय, समृद्धताय आनी उदरगत ह्या ध्येयां खातीर पुराय जिवीतभर वावुरपी पंडीत जवाहरलाल नेहरू हांचो जल्म 14 नोव्हेंबर 1889 दिसा अलाहाबादेंतल्या एका गिरेस्त कुटुंबांत जालो. आवय स्वरुपा राणी आनी बापूय मोतीलाल हांच्या सांगातान संस्कारांनी गिरेस्तकायेंत आनी अपुरबायेन वाडले. मुळावें शिकप घरांतूच जालें आनी मुखार इंग्लडांतल्यान नामनेच्या ‘हॅरो’ शाळेंत शिकले. तांकां वाचनाची खूब गोडी आशिल्ली. कँब्रिज विद्यापिठांतल्यान तांणी शास्त्राची शिकवण घेतली. उपरांत बॅरीस्टर जावन 1912 वर्सा ते भारतांत आयले. कांय काळ तांणी वकिली केली. पुणून वकिलींत तांचें मन चड तेंप रमलेंना. होमरूल लीग चळवळींत तशेंच रॉलेटच्या राक्षसी कायद्याआड चलतल्या आंदोलनांत ते वांटेकार जाले. विवेकशील आनी क्रांतीकारी विचारांक लागून तरणाट्यांक ते ‘उर्बास्थान’ थारले. ते तरी गिरेस्तकायेंत वाडिल्ले आसले तरी देशाच्या गांवगिऱ्या वांठारांनी भोवन दीन दुबळ्यां खातीर कश्टकरी शेतकारां खातीर कितेंतरी करपाचे अशें तांणी थारायलें. टिळक, गांधीजी हांचे सावन प्रेरणा घेवन ते असहकार चवळींत भितर सरले. देशांतल्या भाटकार, गिरेस्त मनीस दीन दुबळ्यांक नाडटात, तांची पिळणूक करता तें पळोवन अर्थीक समते बगर समाजीक समता येवची ना हें तांणी येवजिलें आनी ते वावराक लागले. 1932 ते 1935 च्या काळांत तांकां 1070 दीस बंदखण फावो जाली.
पुणून, उपरांत 1947 सावन 1964 मेरेन स्वतंत्र भारताचे पयले प्रधानमंत्री म्हूण तांची पदभार सांबाळ्ळो. देशांतले दळडीर, निरक्षरताय, अन्नाचो उणाव, फाळणी आदीं प्रस्नांक समर्थपणान फुडो करून पंच वार्षिक येवजण्यांतल्यान देशाक उदरगतीच्या मार्गार व्हेलो. म्हत्वाचें म्हळ्यार तांणी विज्ञानीक नदर आपणायत साबार संशोधन संस्था उबारल्यो.
संवसारीक शांतताये खातीर वावुरले. भुरग्यांचेर ते इतले माया-मोग कररी, पुराय देशांत भुरग्यांचे ते चाचा थारले. देखुनूच भावंडांनो तांचो जल्मदीस ’बालदीन’ म्हूण पुराय देशांत मनयतात. ’आराम हराम है’ हो मंत्र तांणी भरतीयांक दिलो. अशे हे देशाचे शिल्पकार कर्मयोगी भारतरत्न 27 मे 1964 दिसा संवसाराक अंतरले.
भावंडांनो, 14 नोव्हेंबराक आमी तांच्या उगडासान ‘बालदिन’ व्हडा उमेदीन, तरेकवार कार्यावळींनी वांटो घेवन मनोवया हां. तांकां नमळायेन श्रद्धांजली ओंपुया आनी देशाचे समर्थ नागरीक जावन देशाक सुरक्षीत दवरपाचो सोपूत घेवया. तेचपरी बरें शिक्षण घेवन बरे नागरीक जावपाचो संकल्पूय करुया. करतलीं न्हय संकल्प? करुयाच…
तुमचो,
उल्हासभाई