भांगरभूंय | प्रतिनिधी
झेक प्रजासत्ताकाची बार्बोरा क्रेयचीरोव्हा हिणें विम्बल्डन सर्तीच्या बायलांच्या एकोड्या गटांतलें वस्तादपण जोडलें. काल जाल्ले फायनलींत तिणें इटलीचे जास्मीन पाओलिनी हिका 6-2, 2-6 आनी 6-4 अशा तीन सेटांनी हारयली.
मतींत घेवपा सारकी गजाल म्हणल्यार फाटल्या सात वर्सां सावन विम्बल्डनांत बायलांच्या एकोड्या गटांत सात वेगळ्यावेगळ्या खेळगडयांनी वस्तादपण जोडलां.
क्रेयचीरोव्हा हिचो हो पयलो विम्बल्डन किताब आनी वट्ट दुसरो ग्रॅण्ड स्लॅम किताब थारलो. 2021त तिणें फ्रॅंच ओपन जिखिल्ली. दुसरे वटेन जास्मीन हिका अंदूं सेगीत दुसऱ्या ग्रण्ड स्लॅमांत उप वस्तादपणाचेर समाधान मानचें पडलें. अंदूंचे फ्रॅंच ओपनांत लेगीत तिका उप वस्तादपणाचेर समाधान मानचें पडिल्लें.
पयलो सेट बार्बोरान 6-2 असो सहज जिखलो. पूण, दुसऱ्या सेटांत तिका खर प्रतिकाराक तोंड दिवचें पडलें. जास्मीन हिणें दुसरो सेट 6-2 फरकान जिखून मॅचींत 1-1 अशी बरोबरी सादली. तिसऱ्या सेटांत बार्बोरान 5-3 अशी आघाडी घेतिल्ली आनी तिका फकत एक गेम जिखपाची गरज आशिल्ली. पूण, जास्मीन हिणें जबरदस्त खेळ करून सेट 5-4 असो हाडलो. तरी लेगीत बार्बोराक जैताची संद आशिल्ली.
जास्मीन हिणें तिसरे गेमींत 40-30 अशी आघाडी घेवन बार्बोराचेर चेपण हाडलें. 40-40 अशे गूण समान जाल्ले त्या वेळार बार्बोरान अॅडव्हान्टेज मेळयली. पूण, जास्मीन हार मानपाक तयार नाशिल्ली. तिणें अॅडव्हान्टेज आपले कडेन ओडून हाडली. पूण, बॅकहॅण्ड अॅरराक लागून हो सेट व्हगडावचो पडलो आनी बार्बोरान तिसरो सेट 6-4 फरकान जिखून वस्तादपण जोडलें.
बार्बोरान 2018 आनी 2022त विम्बल्डनाचें बायलांच्या दोट्टी गटांतलें वस्तादपण जोडिल्लें. 2022त दोट्टीच्या संवसारीक क्रमवारींत ती पयले सुवातेर आशिल्ली. जाल्यार 2018त तिणें एकोडींत तिणें कारकिर्दींतली सर्वोच्च दुसरी सुवात मेळयिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
