भांगरभूंय | प्रतिनिधी
पणजीः बार्देश म्हालांतल्या जमीन हडप प्रकरणांत सक्तवसुली संचालनालयान (ईडी) मनी लॉड्रींग प्रतिबंधक कायदो 2002 खाला मुख्य सुत्रधार मोहम्मद सुहैल उर्फ मायकल फर्नांडीस, विक्रांत शेट्टी, राजकुमार मैथी हाचे सयत 36 जाणां आड म्हापशें विशेश न्यायालयांत (पीएमएलए) आरोपपत्र दाखल केल्यात. ह्या प्रकरणांत न्यायालयान दखल घेवन दुबावितांक समन्स जारी केले. ह्या प्रकरणाची फुडली सुनावणी 16 वेर जातली.
राज्यांत बनावट कागदपत्रां तयार करून जमनी हडप केल्ल्याच्यो जायत्यो कागाळी आयले उपरांत सरकारान तांची चवकशी करपा खातीर 15 जून 2022 दिसा आयपीएस अधिकारी निधीन वाल्सन हांच्या फुडारपणा खाला विशेश तपास पंगडाची (एसआयटी) स्थापणूक केल्ली. तशेंच हडप केल्ल्या जमनी विशीं कायदेशीर निर्णय घेवपाक 9 सप्टेंबर 2022 दिसा निवृत्त न्यायाधीश व्ही. के. जाधन हांच्या एक वांगडी चवकशी आयोगाची स्थापणूक केल्ली. जाधव आयोगान अहवाल सादर केला, तो सरकारान स्विकारला.
मजगतीं, सक्तवसुली संचालनालयान म्हापशें पुलीस स्टेशनांत नोंद जाल्ल्या जमीन हडप प्रकरणाच्या तीन कागाळेंची दखल घेवन मुळावी चवकशी सुरू केल्ली. तातूंत तांकां मोट्या प्रमाणांत मनी लॉड्रींग जाल्ल्याचे मुखार आयलें. ताका लागून ईडीन एसआयटीन दाखल केल्ल्या बार्देस म्हालांतल्या 15 गुन्यांवांची म्हायती घेवन तपास सुरू केलो. हे संदर्भांत ईडीन 31 मालमत्ता तात्पुरत्यो जप्त केल्लो आसून तांचें मोल 39 कोटी 23 लाख 65 हजार 800 रुपया ग्राह्य धरल्या. मात ताचें बाजारभाव मोल 535 कोटी 13 लाख 87 हजार 800 रुपया परस चड आशिल्ल्याचो दावो ईडीन केला.
ह्या प्रकरणांत ईडीन मुळावी चवकशी करून मुख्य सुत्रधार विक्रांत शेट्टी आनी राजकुमार मैथी हाका 15 फेब्रुवारी दिसा अटक केल्ली. ते उपरांत विशेश न्यायालयान तांकां पयली ईडीची कोठडेंत दवरपाचो आदेश दिल्लो. ती सोंपले उपरांत तांकां न्यायालयीन कोठडेंत दवरले.
मजगतीं, वयल्या दोगांयनी न्यायालयांत जामीन अर्ज दाखल केल्ले. ते न्यायालयान भायरायल्यात. ते उपरांत ईडीन मुळावी चवकशी करून म्हापशें विशेश न्यायालयांत (पीएमएलए) 7,459 पानी आरोपपत्र दाखल केले. तातूंत तांणी 36 जाणांक साक्षीदार केल्या, जाल्यार आरोपपत्रांत 10 कागाळदारांची आनी 47 जाणांची दुबावीत, सरकारी अधिकारी हेर संबंदितांची मेळून 57 जाणांची साक्ष नोंद केल्या. सोमार 13 मे दिसा न्यायालयांत सुनावणी जाली तेन्ना न्यायालयान आरोपपत्रांची दखल घेवन दुबावितांक समन्स जारी करून फुडली सुनावणी 16 मे दिसा दवरल्या.
——————-
दुबावितांची वळेरी
मुख्य सुत्रधार मोहम्मद सुहैल उर्फ मायकल फर्नांडीस, विक्रांत शेट्टी, राजकुमार मैथी, सॅड्रीक फर्नांडीस, रॉयसन रॉड्रिग्ज, कायतान फर्नांडीस, रिटा फर्नांडीस, नालास्को मास्करेन्हास, ज्योकीम मास्करेन्हास, ओंकार पालयेंकार, रामचंद्र दाभोलकार, नरेश सातार्डेकार, प्रदीप पुणेकर, डेन्वर डिसोझा, सुनील कुमार, हाशिम टी. एम, लेंछू जेम्स, जितीन जेम्स, अन्सारी शामसुद्दीन, कुशबू कुमारी, धीरेश नायक, शिवानंद मडकयकर, शिराज विश्राम, रायाजी गणपती पाटील, संजय पाटील, रत्नाकर प्रभू, श्रीधर कट्टीमणी, मीना रमाकांत नायक, लुईझा फर्नांडीस उर्फ लुईझा डायस, पावलिना दिनीझ उर्फ पलमिरा गाॅन्साल्वीस, मारायनो गाॅन्साल्वीस, आंतोनेता फर्नांडीस, मारिया आंजेला फर्नांडीस, सिद्धेश सदाशिव परब, शमीर मोहम्मद शेख आनी हरुण माटीवाला.
—————–
मुख्य सुत्रधारा सयत पांच जाण गायब
दुबावितां मदीं मुख्य सुत्रधार मोहम्मद सुहैल उर्फ मायकल फर्नांडीस हाचे सयत ताचो भाव शमीर
मोहम्मद शेख आनी भाचाे डेन्वर डिसोझा, रायाजी गणपती पाटील आनी हरुण माटीवाला फरारी अासून ईडी तांचो सोद घेता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
