बार्देस बाजार संचालक मंडळान सामुहीक राजिनामो दिवचे: खलप

भांगरभूंय | प्रतिनिधी

म्हापशेंः बार्देस बाजार सहकारी सोसायटीच्या संचालक मंडळांत गटबाजी जाल्ल्यान कांय संचालकांनी घेतिल्ले पत्रकार परिशदेंत उक्तें जाला. सध्याच्या मंडळान पांच खेपे चेअरमनपद बल्लें. जाल्यार मंडळाचो कार्यकाळ सोंपपाक फकत 6 म्हयने उरिल्ले आसतना चेअरमनाचेर अविस्वास थाराव मंजूर करून सोसायटीक फाटले देड म्हयनो दिव्यांग करून सोडला. संस्थेंत घाणयारे आनी विखारी राजकारण खेळपा परस सगल्या संचालकांनी सामूहीक राजिनामे दिवन उक्त्या पद्दतीन वेंचणूक लडोवची, अशें आव्हान आदले चेअरमन निखीलचंद्र खलप हांणी धर्मा चोडणकार गटाक दिलां.

शुक्रारा 31 वेर म्हापश्यां घेतिल्ले पत्रकार परिशदेंत ते उलयताले.

ह्या वेळार ज्येश्ठ संचालक महादेव नाटेकार, एकनाथ नागवेंकार, निर्मला खलप, नारायण राठवड आनी प्रमोद कर्पे हे संचालक हजर आशिल्ले.

हालीच धर्मा चोडणकार गटान पत्रकार परिशद घेवन खलप गटान सोसायटीच्या अध्यक्षपदार निखीलचंद्र खलप हांची केल्ली निवड बेकायदो आनी योग्य पद्दतीन कायदेशीर प्रक्रिया पुराय आनी फटवणूक करून केल्ल्याचो दावो केल्लो.

विरोधी गटाच्या पत्रकार परिषदेंत संस्थेच्या सरवेवस्थापकांनी लेगीत हजेरी लायिल्ल्यान खलप हांणी उजाप उक्तायलें.

निखिलचंद्र खलप हांणी म्हणलें, आदल्या चेअरमन गटान आमचेर केल्ल्या आरोपांत तथ्य ना. आमी नवो चेअरमन खंयच्या आदाराचेर आनी संख्याबळाचेर निवडला, हाचें स्पश्टीकरण आमी सहकार खात्याच्या सहाय्यक निबंधकांक लेखी दितले. जाल्यार 3 वेर चेअरमनपदाचे निवडी खातीर बसका आयोजीत करपाचो थाराव खंयचे बसकेंत जाल्लो. तशेंच ही बसका केन्ना जाली. त्या वेळार 11 तल्यान एक तृतियांश संचालकांचो कोरम आशिल्लो व्हय, हाचें स्पश्टीकरण ह्या संचालकांनी दिवपाक जाय. देखून कोण कायदेशीर आनी कोण बेकायदो हे दिसून येतले.

ह्या आदल्या चेअरमनान बार्देस बाजार सोसायटीच्या संचालक मंडळांत आनी भागधारकां मदीं अस्थिरताय निर्माण करपाचो यत्न करपा परस चड कांयच केलें ना. सोसायटीचे उदरगतींत ह्या गटाक कसलीच आवड ना. अध्यक्षपद तिगोवन दवरप होच तांचो एकूच हेतू आनी महत्वाकांक्षा असो आरोप खालप हांणी केलाे.

——————–

संस्थेच्या स्वबळाचेर मॉल प्रकल्प उबारप आवडले ना: खलप

बार्देस बाजार ग्राहक सहकारी संस्था मरड-म्हापश्यां जमीन आसा. थंय मॉल बांदपाची येवजण आसा. ते प्रमाण अध्यक्ष म्हूण हांवें संघटणेच्या स्वताच्या साधनसंपत्तीचेर त्या जाग्यार मॉल बांदपाची कल्पना फुडें व्हेली. पूण विरोधी पंगडाक ही गजाल आवडली ना आनी एक युक्ती वापरून तांणी म्हजी आवय विदेश भोंवडेर आसतना म्हजे आड अविस्वास प्रस्ताव हाडलो अशें निखिल चंद्र खलप हांणी सांगलें.

————-

फाटलो देड म्हयनो अध्यक्ष नाशिल्ल्यान समाजाचें प्रशासकीय काम थांबिल्लें. समाजाक कसलेंच लुकसाण जावचें न्हय हे खातीर आमी फाटल्या बसकेंत नवो अध्यक्ष परतून वेंचून काडला. उरफाटें विरोधी पंगडान संचालक तशेंच भागधारकां मदीं विखारी वातावरण तयार केलें. ह्या विखारी प्रवृत्ती पासून सोसायटीची राखण करपा खातीर आमी ही कारवाय केल्या अशें निखिल चंद्र खलप हांणी स्पश्ट केलें.