भांगरभूंय | प्रतिनिधी
उमेदवारी अर्ज शुल्क 100 वेल्यान 2 हजार रुपया
म्हापशें: बार्देस बाजार गिरायक सहकारी सोसायटीच्या संचालक मंडळाची वेंचणूक 5 ऑक्टोबराक जातली. हे वेंचणुके खातीर उमेदवारी अर्ज शुल्कांत खूबशे पटीन वाड केल्या आनी ह्या वेळा पयलेच फावटी अनामत शुल्क म्हूण 10 हजार रुपया रक्कम लागू केल्ले खातीर भागधारक तशेंच इत्सूक उमेदवारां मदीं निरशेणी पातळ्ळ्या.
सहकारी सोसायटीचे उत्तर गोंय सहाय्यक निबंधक तशेंच बार्देस बाजाराचे वेंचणूक अधिकारी रामेश्वर दाबोळकार हांणी सोसायटीच्या वेंचणुकेची वेळापत्रक नोटीस जारी केल्या. हे वेंचणुके खातीर उमेदवारी अर्ज 2 हजार रुपया केल्या. फाटले फावटी ही रक्कम फक्त 100 रुपया आशिल्ली. तशेंच अनामत रक्कम शुन्य आशिल्ली.
बार्देस बाजाराच्या 2025-30 ह्या काळा खातीर संचालक मंडळाची वेंचणूक 5 ऑक्टोबराक सकाळीं 8 ते 5 वरां मेरेन जातली. गोंय सहकारी संस्था नेम 2003 च्या नेम 64 प्रमाण उमेदवारी अर्ज दरेक 200 रुपया आनी 10 हजार रुपया अनामत शुल्क भरून मेळूंक शकता अशें ह्या नोटीसे वरवीं कळीत केलां. सहकारी मळ हें सामान्य लोकां खातीर आसा आनी शुल्क वाडयिल्ल्यान सामान्य मनीस ह्या मळा पसून पयस वतलो अशें मत सोसायटीच्या भागधारकांनी उक्तावन वाडयिल्ल्या शुल्काचेर निरशेणी उक्तायली.
सोसायटीचे आदले अध्यक्ष निखीलचंद्र खलप हांणी म्हणलें, उमेदवारी अर्जा खातीर शुल्क 100 रुपया वेल्यान दोन हजार रुपया केल्ल्यान म्हाका धक्को बसला. सहकार मळ सामान्य लोकां खातीर आशिल्ल्यान ही वाड परवडपी आसूंक जाय आशिल्ली. हें मळ सामान्य मनशा खातीर तयार केलां आनी तें तांकां परवडूंक शकतलें आनी सगल्यां खातीर येवकाराचें आसूंक जाय.
आदले अध्यक्ष नारायण राटवड हांणी लेगीत शुल्क वाडीचेर निरशेणी उक्तायली. फाटले वेंचणुकेंत उमेदवारी शुल्क 100 रुपया आशिल्लें. जें सगल्यांक परवडपी आशिल्लें. पूण अंदूं तें दोन हजार रुपया केलां जें समर्थनीय ना.
फाटले वेंचणुकेंत अनामत शुल्क लेगीत नाशिल्लें. पूण ह्या वेळा हें शुल्क लागू केलां. जाका लागून सामान्य भागधारक वेंचणूक लडोवपा पसून वंचीत उरूंक शकतात. कारण आतां बार्देस बाजाराची वेंचणूक लडोवपा खातीर उण्यांत उणें 12 हजार रुपया गरजेचे आसात अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
