भांगरभूंय | प्रतिनिधी
समान संख्येक लागून अध्यक्षपदाची निवड आडखळ्ळ्या
भांगरभूंय । प्रतिनिधी
म्हापशें: म्हापशेंच्या बार्देस बाजार गिरायक सहकारी सोसायटीचें अध्यक्षपद फाटल्या देड म्हयन्या सावन रितें आसा. उपाध्यक्ष चंद्रकांत शेटगांवकार हे प्रभारी अध्यक्ष म्हूण कार्यभार सांबाळटात. संचालक मंडळांतले सत्ताधारी आनी विरोधा गटांत समान संख्याबळ आशिल्ल्यान एकाद्या चालका विणें बस चलोवची, असो हो प्रकार सहकार मळा वयले हे नामनेचे संस्थेंत चालू आसा.
संचालक धर्मा चोडणाकर आनी तांच्या स संचालकांनी तेन्नाचे अध्यक्ष निखीलचंद्र खलप हांचे आड दाखल केल्लो अविस्वास थाराव 9 डिसेंबराक 2024 ह्या दिसा 6 आड 5 अश्या मतांनी संमत जाल्लो. त्या वेलार निखीलचंद्र खलप हांची संचालक आशिल्ली आवय निर्मला खलप विदेशांत आशिल्ली.
चोडणकार गटांतलो एक संचालक प्रमोद कर्पे हांणी थारावा आड मतदान केलें सध्याचे स्थितींत उपाध्यक्ष चंद्रकांत शेटगांवकार हे प्रभारी अध्यक्ष म्हूण कामकाज पळयतात. पूण तांच्या कारभाराचेर संचालक खोशी नात.
सध्या हे संस्थेंत संचालकांचें संख्याबळ 6-6 अशें समान आशिल्ल्यान अध्यक्ष वेंचपा खातीर आशिल्लो आंकडो कोणाच कडेन ना. अशे स्थितींत सोसायटीच्यो बसका जातात, मात प्रभारी अध्यक्षाक म्हत्वाचें निर्णय घेवपाचो अधिकार नाशिल्ल्यान संस्थेची बी बस कशी तरी चलयतात. हाचो प्रशासनाचेर परिणाम जाला. मॉल प्रकल्प सध्या हुमकळत पडला, ताची बुन्याद लेगीत घालपाचीं चिन्नां दिसनात. सध्याच्या संचालक मंडळाचो कार्यकाळ फकत स म्हयनेच आसा. ताका लागून वेंचणूक जावन नवें संचालक मंडळ केन्ना अस्तित्वांत येता हाचे कडेन भागधारकांचें लक्ष आसा. जाल्यार कांय संचालक वेंचणुकेचे तयारेक लागल्यात.
नवो अध्यक्ष वेंचपाचे प्रक्रिये विशींचो प्रस्ताव संचालक मंडळा कडल्यान सहकार खात्याक धाडटले. सध्यातरी संस्थेचें प्रशासन सुरळीत चल्लां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
