भांगरभूंय | प्रतिनिधी
भांगरभूंय । प्रतिनिधी
पणजी : बार्देस आनी पेडणें म्हालांतलें जमनीचें उण्यांत उणें मोल 3 हजार रुपया प्रती चौखण मिटरा वयल्यान 8 हजार रुपया प्रती चौखण मिटर करपाचो निर्णय मंत्रीमंडळान घेतला. ही वाड फकत वेवसायीक वापरा खातीर आसा. तशेंच चार सुवातां वयल्या 2 दशलक्ष टन खण म्हालाचे ई पावणेक मंत्रीमंडळान मान्यताय दिल्या.
पर्वरी मंत्रालयात मंत्रीमंडळाची बसका जाली. मुख्यमंत्री डॉ. प्रमोद सावंत हांणी पत्रकार परिशदेंत मंत्रीमंडळाच्या निर्णयांची म्हायती दिली.
सरकाराची येणावळ वाडपा खातीर बार्देस आनी पेडणें म्हालांत जमनीचें मोल वाडोवपाचो निर्णय घेतलो. बार्देस आनी पेडणें ह्या दोन म्हालांत जमनीचें मोल 3 हजार रुपया प्रती चौखण मिटरा वयल्यान 8 हजार रुपया प्रती चौखण मिटर जातलें. ह्या दोनूय म्हालांनी जमीन विक्रीचें प्रमाण वाडत आसा. तशेंच बांदकामां आनी हेर प्रकल्प सुरू जायत आसात. गोंयचे उदरगती खातीर दोन म्हालांनी जमनीचें मोल वाडोपाचो निर्णय घेतला. हेर म्हालांनी 3 हजार रुपया चौखण मिटर हो पयलीचोच दर आसतलो. हे दरवाडीचो सामान्य लोकांक फटको बसचो ना, हाची जतनाय सरकारान घेतल्या. 500 चौखण मिटर मेरेन पयलीचेच 3 हजार रुपया प्रती चौखण मिटर मोल आसतलें. 500 चौखण मिटरां वयर 8 हजार रुपया मोल लागू जातलें. घर बांदपा खातीर जे जमनीची खरेदी, विक्री जाता, ताका फटको बसचो ना. सामान्य मनीस घर बांदपा खातीर 500 चौखण मिटर मेरेनूच जमनीची खरेदी करता, अशें मुख्यमंत्र्यांनी सांगलें.
2 दशलक्ष खण म्हालाची ई पावणी
गोंयांत 4 सुवातां वयल्या 2 दशलक्ष खण म्हालाचे ई पावणेक मंत्रीमंडळान मान्यताय दिल्या. जेटी तशेंच हेर सुवातांचेर आशिल्ल्या खण म्हालाचे पावणेक सर्वोच्च न्यायालयान मान्यताय दिल्या. आतां मेरेन 29 ई पावण्यो जाल्यात. आतां 30 वे ई पावणेंत 2 दशलक्ष खण म्हालाची ई पावणी जातली. सरासरी 895 रुपया प्रती टन अशें मोल मेळटा. खण ब्लाकाची पावणी प्रक्रिया सुरू आसा.
खण म्हालाचे ई पावणेक लागून ऑक्टोबराच्यान ट्रकांची येरादारी सुरू जातली. पावणी केल्ली एक खण सुरू जाल्या. नोव्हेंबर मेरेन चार खणी सुरू जातल्यो, अशें मुख्यमंत्री डॉ. प्रमोद सावंत हांणी सांगलें. तशेंच मंत्रीमंडळान कोंकण रेल्वेच्या बाळ्ळी वाठारांत 220 केव्ही सबस्टेशनाक मान्यताय दिल्या. तशेंच पर्वरी पोरणे मार्केटांतल्या 18 दुकानांक नव्या मार्केटांत स्थलांतरण करपाक मान्यताय दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
