भांगरभूंय | प्रतिनिधी
बार्देसांत 250 हॅक्टर, दिवचले 150 हॅक्टर शेतांचेर उदक
भांगरभूंय । प्रतिनिधी
पणजी : पावसान विसव घेतिल्ल्यान शेतांचे लुकसाणेची मोलावणी विभागीय शेतकी अधिकाऱ्यांनी नेटान सुरू केल्या. गोंयच्या सगळ्या म्हालांनी शेतांचें लुकसाण जालें आसलें तरी बार्देस आनी दिवचल म्हालांत लुकसाणेचें प्रमाण चड आसा. बार्देस म्हालांत 250 हॅक्टर जाल्यार दिवचल म्हालांत 150 हॅक्टर शेतांचें लुकसाण जालां. अधिकाऱ्यां कडल्यान लुकसाणेची मोलावणी सुरूच आशिल्ल्यान हें प्रमाण वाडप शक्य आसा, अशी म्हायती शेतकी खात्याच्या अधिकाऱ्यांनी दिली. पुराय गोंयांतल्या लुकसाणेचें प्रमाण 741 हॅक्टर आसा.
सांगें म्हालांत 17 हॅक्टर, साश्ट म्हालांत 40 हॅक्टर, केपें म्हालांत 6 हॅक्टर, फोंडें म्हालांत 79 हॅक्टर शेतांचे लुकसाण जालां. धारबांदोडें म्हालांत 11 हॅक्टर, तिसवाडींत 55, काणकोणां 8.5 हॅक्टर, सत्तरींत 38 हॅक्टर, पेडण्यां 63 हॅक्टर जाल्यार मुरगांवां 19 हॅक्टर शेत जमनीचें लुकसाण जालां. शेतकारां कडल्यान जशे अर्ज येताट, तसतशे शेतकी खात्याचे अधिकारी भेट दिवन मोलावणी करतात. खूबश्या अर्जांची मोलावणी अजून करपाची आसा.
गोंयांत मॉन्सून पावतकच पावसाक सुरवात जाली. जूना परस जुलयांतल्या पावसाचें प्रमाण चड आशिल्लें. पावसा सयत वादळी वाऱ्याक लागून शेतांचे लुकसाणेंत वाड जाली. ज्या शेतांतलें उदक व्हांवून गेलें तीं शेतां काय प्रमाणांत सुरक्षीत उरलीं. ज्या शेतांत उदक सांठून रावलें तीं शेतां पेड्डेर जालीं, अशें शेतकी संचालक संदीप फळदेसाय हांणी सांगलें.
दिवचल वाठारांत 85 हॅक्टर शेतांचें लुकसाण जालां जाल्यार सांखळी वाठारांत 65 हॅक्टर शेतांचें लुकसाण जालां. साखळे दिवचल म्हालात येता. हाका लागून दिवचल म्हालात 150 हॅक्टर शेतीचे लुकसाण जालां.
लुकसाणेची मोलावणी बेगिनात बेगीन करून शेतकारांक लुकसाण भरपाय दिवपाचे आदेश मुख्यमंत्री डॉ. प्रमोद सावंत हांणी दिल्या. हाका लागून सगळे अर्ज बेगिनात बेगीन निकालात काडपाची प्रक्रिया सुरू जाल्या. तिसवाडी, साश्ट, बार्देस, मुरगांव ह्या म्हालांतल्या शेतांचें लुकसाण हें शेतांत उदक भरिल्ल्यान जालां. दिवचल, सत्तरी आनी फोंडें म्हालांतल्या शेतांचें लुकसाण हें वादळी वाऱ्याक लागून जाल्या. पावसांत जीं तवशीं, चिबडां, घोसाळीं आनी भेंड्यांची लागवड जाता, तांकां लेगीत लुकसाण भरपाय दिवपाचो निर्णय सरकारान घेतला.
म्हाल शेतांचें लुकसाण (हॅक्टरांत)
बार्देस 250, दिवचल 150, सांगें 17, साश्ट 40, केपें 06, फोंडें 79, धारबांदोडें 11, तिसवाडी 55, काणकोण 8.5, सत्तरी 38, पेडणें 63, मुरगांव 19.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
