भांगरभूंय | प्रतिनिधी
पणजी: बार्देस कोंकणी अस्मिताय केंद्रान श्रीदोरा काकुलो म्हाविद्यालयाच्या जोड पालवान फटाफट आनी आपउलोवप सर्तीचें आयोजन केलें. हे सर्तींत 20 भुरग्यांनी वांटो घेतिल्लो. फटाफट सर्तींत अंतरा पर्रीकार सारस्वत विद्यालय म्हापशें, साहील गोवेकर सेंट अँथनी विद्यालय धुळेर, अमोध नायक सेंट झेवियर विद्याल मयडें हांका वळेरेन पयलें, दुसरें आनी तिसरे इनाम फावो जाले.
आपउलोवप सर्तींत श्लोक वाळके सारस्वत विद्यालय म्हापशें, काव्या देसाय दत्ताराम मंत्रावादी मेमोरियल हायस्कूल म्हापशें, ध्रूव शिरोडकार सेंट झेवियर हायस्कूल मयडें हांकां पयलें, दुसरें, तिसरें इनाम फावो जालें.
स्नेहा साळगांवकर, स्नेहल वझे, प्रियांका मांद्रेंकार आनी डॉ. विरजा वर्लेकारान परिक्षक म्हूण काम पळयलें.
सोनल वझे हांणी भुरग्यांक मार्गदर्शन करताना सांगलें, कोंकणी ही आमची आवयभास आशिल्ल्यान आमी दर एकल्यान ती अभिमानान उलोवंक जाय. वेगळेवेगळे विशय घेवन सादरीकरण केल्ले खातीर भुरग्यांचीय तांणी तुस्त केली.
वाचनाचेर भर दितना डॉ. विरजा वेर्लेकारान सांगलें, भुरग्यांनी खूब वाचन करपाक जाय, वाचनान भास सुदारता आनी नव्या उतरांची भर पडटा. कार्यकारी मंडळाच्यो पदाधिकारी प्रिती फुलारी, नयना कामत, प्रविणा थळी आनी सोनाली चोडणकारान परिक्षकांची वळख करून दिली, आनी केंद्राच्या वांगड्यांनी परिक्षकांक यादस्तीक भेटयलें.
प्रिती फुलारी, नयना कामत आनी कुसूम अग्रवाल हांणी संयोजक म्हूण काम पळयलें. केंद्राचे सचीव सुचेता पै हांणी उपकाराचें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
