भांगरभूंय | प्रतिनिधी
परतून परतून बंद पडपी लिफ्टीक लागून लोकांचे हाल
भांगरभूंय । प्रतिनिधी
म्हापशें: म्हापशेंच्या बार्देस उपनिबंधक (सब रजिस्ट्रार) कार्यालयाची लिफ्ट परतून परतून बंद पडटा. सध्या वीज पुरवणेची समस्या निर्माण जाल्ल्यान ही लिफ्ट बंद आसा. लिफ्ट नाशिल्ल्यान दुसऱ्या माळ्या वयल्या ह्या कार्यालयांत येवपाक- वचपाक चड करून जाण्यांक आनी दिव्यांग व्यक्तीं मुखार व्हड समस्या उप्रासल्या.
गोंय सरकारान मरड- म्हापश्यां एस्सार ट्रेड सेंटर हे खाजगी दोन माळ्यांचे इमारतींतल्या दुसऱ्या माळ्यार उपनिबंधक कार्यालय सुरू केलां. तशेंच ह्या कार्यालया खातीर खाशेली लिफ्टीची वेवस्था केल्या. मात ही लिफ्ट परतून परतून बंद पडटा. हे खातीर लोकांक इस्कातीचीं सुमार शंबरेक सोंपणां चडचीं- देंवचीं पडटात. चड करून दिव्यांग आनी जाण्ट्यांक हाचो खूब त्रास जाता. खूब जाणआंक आपल्या पालकांक वा सोयऱ्यांक उखलून दोन माळे चडचे पडटात. इस्कातीचेर चडपाक- देंवपाक कसलीच रेंलीग आदाराची वेवस्था करूंक ना. हे खातीर लोकांक वण्टीचो आदार घेवचो पडटा. बुधवारा 18 सप्टेंबराक बार्देस म्हालांतल्या एका राजकारण्याच्या चल्याक लेगीत उपनिबंधक कार्यालयांत वचपा खातीर इमारतींतलीं सोपणां चडपाचो अणभव घेवचो पडलो.
बार्देस उपनिबंधक कार्यालयाचे लिफ्टीचे वीज पुरवणेचे फेसींत दोश निर्माण जाल्ल्यान ती लिफ्ट बंद आसा. तो दोश तज्ञां कडल्यान सोदपाचो यत्न चल्ला. वीज पुरवण समस्येचें कारण कळ्ळे उपरांत तत्काळ ती दुरुस्त करतले, अशी म्हायती एका अधिकाऱ्यान दिली.
मालमत्ता खरेदी- विक्री खातीर उपनिबंधक हें म्हत्वाचें कार्यालय. ह्या कार्यालयांत जाण्ट्यांचे चड येवप- वचप आसता. तांचे सुविधे खातीर कार्यालयाक सरकारान दुसरी सुवात घेवपाक जाय. परतून परतून बंद पडपी समस्येचेर सासणाचो उपाय काडपाक जाय, अशी मागणी संजय गडेकार हांणी केली.
स्मृती इराणी हांणीय केल्ली कसरत
बार्देस म्हालांत मालमत्ता घेतिल्ली आदली केंद्रीय मंत्री स्मृती इराणी हांकांय 2017 त ह्या उपनिबंधक कार्यालयांत जमनीचें खरेदीपत्र करचे खातीर इमारतीचीं सोपणां चडचे खातीर खुबूच कसरत करची पडिल्ली. हो प्रकार तांणी तेन्नाचे मुख्यमंत्री मनोहर पर्रीकार हांचे नदरेक हाडून दिल्ली. तशेंच विधानसभा अधिवेशनांत लेगीत हो प्रस्न उपस्थीत जाल्लो. ते उपरांत गोंय राज्य साधन सुविधा मंडळा वतीन 2018 त हे इमारतींत फक्त उपनिबंधक कार्यलया खातीर लिफ्टीची वेवस्ता केल्ली. ते उपरांत लिफ्ट उबारिल्ले एजन्सीक देय रकम थकीत दवरप, देखभाल कबलात सोंपप, वीज पुरवणेंत समस्या निर्माण जावप, अश्या कांय कारणांक लागून लिफ्ट परतून परतून बंद दवरपाचे प्रकार घडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
