भांगरभूंय | प्रतिनिधी
म्हापशें: वादळी वारो आनी घोग्यांनी पडपी पावसाक लागून म्हापशें शारा सयत बार्देस म्हालांत विवीध वाठारांनी वट्ट 24 पडझडीच्यो घडणुको घडल्यो. खोर्ली- शीम आनी सडयें- शिवोले दोन घरांचेर झाडां पडून दोन जाण्ट्यां बायलां सयत तीग जाणां जखमी जाले.
म्हापशेंच्या खोर्ली- शीम वाठारांतल्या साळगांवकार कुटुंबियांच्या घराचेर झाड पडून पुराय घराचें लुकसाण जालें. घराचे नळे फुटून आंगार पडिल्ल्यान प्रभावती साळगांवकार आनी रेषा साळगांवकार ह्यो जाण्ट्यो बायलो जखमी जाल्यो. तांचे तकलेक घावो जालो. जखमींक उपचारा खातीर म्हापशेंच्या जिल्हो हॉस्पिटलांत दाखल केलीं. थळावी नगरसेविका कमल डिसोझा आनी पालिका अधिकाऱ्यांनी घडणुकेची पळोवणी केली. म्हापशें उजो पालोवपी दळाच्या जवानांनी झाड कांपून कुशीक काडलें. हातूंत सुमार 10 लाखांचें लुकसाण जालें.
मजगतीं, दोन दिसां आदींच साळगांवकार कुटुंबियांनी हें झाड मारपा संबंदांत उपजिल्होधिकाऱ्या कडेन अर्ज केल्लो. ह्या झाडा कुशीक आनीक दोन झाडां आनी एक माड कोसळपाच्या मार्गार आसा.
दुसरी दुर्घटणा सडये शिवोले घडली. घराचेर झाड पडिल्ल्यान महेश कळंगूटकार जखमी जालो. घडणुके वेळार कळंगूटकार खाटीर न्हिदिल्लो. त्या वेळार झाड पडिल्ल्यान घराचो काँक्रीट खांबो प़डलो आनी ताच्या पोंदा तो चिड्डलो. ही घडणूक सकाळीं 11 वरांच्या सुमाराक घडली. हे दुर्घटणेंत 5 लाखांचें लुकसाण जालें.
मार्ना शिवोलीच्या विकास फुलारी हांच्या घराचेर माड पडलो. जाल्यार बिठ्ठोणां यामीन खान हांच्या घराचेर तशेंच वेर्लेच्या एका घराचेर झाड पडून लुकसाण जालें. बार्देसांतल्या मार्ना शिवोली, नास्नोळें, गिरी, ओशेल, वेर्लें- काणका, पिर्णां, एकोशी, बिठ्ठोण, पुंडलीकनगर पर्वरी, व्हळवाडो पिळर्ण ह्या वाठारांत झाडां पडून लायटीचे खांबे मोडलें आनी सरयो तुटल्यो. म्हापशें, पर्वरी आनी पिळर्ण उजो पालोवपी दळाच्या जवानांनी हीं झाडां कांपून कुशीक काडलीं.
म्हापश्यां इमारतीचे पत्रे हुबले
म्हापशें मार्केटाच्या फाटले वटेन आशिल्ले जेस्मीन इमारतीच्या पाख्या वयले पत्रे वादळी वाऱ्यान हुबरे आनी बाजारपेठेचेर पडले. सुदैवान हे पांच पत्रे दुकानांचेर आनी वीज सरयां वयल्यान मार्केटांतल्या रस्त्याचेर मेकळे सुवातेर पडिल्यान कोणाक दुखापत जावंक ना. वेपारी संघटणेचे अध्यक्ष श्रीपाद सावंत हांणी पदाधिकाऱ्यां सयत घडणुकेचे सुवातेर भेट दिवन पळोवणी केली. ते इमारतीची पत्र्याची पुराय शेड धातादायक जाल्या. म्हापशें पालिके कडल्यान बिरेस्तारा संबंदीत इमारत धनयाक नोटीस जारी करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
