भांगरभूंय | प्रतिनिधी
म्हापशें: येरादारी खात्याच्या म्हापशें कार्यालया कडल्यान नव्या मोटार वाहन कायद्या खाला गाडी चलोवपी सुमार 950 जाणांचे परवाने निलंबीत केल्यात. चालू आशिल्ल्या वर्सांत दोन म्हयन्यांत 400 जाणांचेर ही कारवाय केल्या.
गोंयांत एप्रील 2022 सावन नवीन मोटार वाहन कायद्याची अंमलबजावणी केल्या. ह्या सुदारीत कायद्या प्रमाण येरादारी नेम मोडप्यांक व्हड दंडात्मक रक्कम जमा करची पडटा. ते भायर कांय नेम मोडल्यार दंडात्मक कारवाये सयत स म्हयने गाडी चलोवपाचो परवानो रद्द करपाची तजवीज केल्या. ते प्रमाण बार्देस म्हालांत फाटल्या एप्रील ते डिसेंबर मेरेन ह्या आठ म्हयन्यांच्या काळांत 543 गाडी चलोवप्यांचे परवाने निलंबीत केल्ले. अंदूं चालू वर्सांत येरादारी पुलीस आनी येरादारी खात्यान येरादारी नेम मोडपी गाडी चलोवप्यांचे परवाने रद्द करपाचेर भर दिला.
फाटल्या दोन म्हयन्यांत म्हणल्यार 59 दिसांनी 400 गाडी चलोवप्यांचे परवाने निलंबीत केल्यात. हे सरासरी प्रमाण दिसाक 6 ते 7 गाडी चलोवप्यांचे परवाने निलंबीत केल्यात. म्हापशें, कळंगूट, हणजूणे आनी पर्वरी येरादारी पुलीस स्टेशना कडल्यान आयिल्ल्या अहवालाच्या आदारान येरादारी खात्यान ही कारवाय केल्या.
सोरो पियेवन गाडी चलोवप, हॅल्मेट घालिनासतना दुचाकी चलोप, ट्रीप्पल सीट, सिग्नल मोडप, बेकायदो तरेन गाडयेंत प्रवाशांक बसोवप, घाळपणान गाडी चलोवप, अशे नेम मोडपी गाडी चलोवप्यांचेर परवाने निलंबीत करपाची कारवाय केल्या. येरादारी पुलिसांनी नेम मोडपी गाडी चलोवप्यांक धरून तांचेर दंडात्मक कारवाय करतात. उपरांत संबंदीत गाडी चलोवप्या संबंदीत अहवाल येरादारी खात्या कडेन धाडटात. ते उपरांत येरादारी खात्या कडल्यान स म्हयन्यांच्या काळा खातीर गाडी चलोवप्याचो परवानो निलंबीत करपाची कारवाय करतात, अशी म्हायती येरादारी खात्याच्या अधिकाऱ्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
