भांगरभूंय | प्रतिनिधी
महसूल खात्याच्या आदेशाचेर उदक; आळाबंदा घालपाक उपजिल्होधिकारी, घोळट्या पंगडाक अपेस
भांगरभूंय । प्रतिनिधी
म्हापशें: सरकारान आदेश दिवन लेगीत बार्देस म्हालांतल्या म्हामार्ग रुंदीकरण वाठारांत तशेंच शेत जमनींचेर बेकायदो मातयेचो भराव घालपाचे प्रकार चालूच आसात. हे बेकायदो शेत जमनीं पुरोवपाचे प्रकार बंद करपाक उपजिल्होधिकारी कार्यालय तशेंच घोळटे पंगड अपेशी थारल्यात.
सरकाराच्या महसूल खात्यान फेब्रुवारींत आदेश जारी करून गोंयांतले राष्ट्रीय म्हामार्ग आनी राज्य म्हामार्गाचे कुशीन रस्तो रुंदीकरण वाठारांत बेकायदो तरेन मातयेचो भराव घालपाच्या प्रकारांचेर जमीन महसूल कायदो, कोमुनिदाद कायदो आनी गोंय जमीन वापर (बांदकाम बंदी) कायद्या प्रमाण कारवायेचे निर्देश संबंदीत म्हाल उपजिल्होधिकारी, मामलेदार आनी घोळट्या पंगडांक दिल्ले. ह्या आदेशाची कार्यवाही 48 वरां भितर करून मातयेचो भराव घातिल्ल्या बेकायदो प्रकारांचेर कारवाय करची, अशेय निर्देश दिल्ले.
ह्या निर्देशा प्रमाण बार्देशाच्या उपजिल्होधिकाऱ्यान मामलेदार आनी संबंदीत अधिकारी वर्गा वांगडा राष्ट्रीय म्हामार्ग तशेंच राज्य म्हामार्ग आनी हेर रस्त्यांचे कुशीक रस्तो रुंदीकरण वाठारांत मातयेचो भराव उडयिल्ल्या सुवातांची पळोवणी केल्ली. ह्या वेळार बार्देसांत म्हापशें सयत हेर गांवांतल्या 36 सुवातांचेर मातयेचो भराव घालून बांदकामां उबारिल्ल्याचें नदरेक आयिल्लें. ते प्रमाण कोमुनिदाद प्रशासकांनी ह्या बांदकामांक नोटिसो जारी केल्यात.
तरी लेगीत राष्ट्रीय म्हामार्गाचेर सुकूर आनी नामोशी गिरी तशेंच हेर वाठारांतल्या शेत जमनींनी मातयेचो भराव घालून बांदकामां उबारतात. पूण हीं बेकायदो बांदकामां आनी शेत जमनीं पुरोवपाच्या प्रकारांचेर बार्देश उपजिल्होधिकारी कार्यालय आनी घोळट्या पंगडा कडल्यान कसलीच कारवाय करिनात. ते भायर हे प्रकार उक्तेपणी चालू आसतना ताचेर आळाबंद घालिनात. महसूल खात्याच्या आदेशाक बार्देसांत उदक सोडलां. ह्या वाठारांतल्या शेत जमनींत मातयेचो भराव घालून शेड बांदप, मार्बलाचो वेवसाय, कावलां अड्डे उबारप, पक्क्या इमारतींचीं आनी दुकानांचीं बांदकामां सुरू आसात. हो सगळो बेकायदो प्रकार कोमुनिदाद, कूळ आनी थळाव्या पंचायतीच्या आशिर्वादानूच सुरू आसात.
शेत जमनीं पुरोवपाच्या प्रकारांत वाडः भिके
हालींसराक बार्देश म्हालांत बेकायदो तरेन शेत जमनीं पुरोवपाचे प्रकार चालू आसात. फाटल्या स- सात वर्सांत ह्या प्रकारांक ओतो आयला. हाचेर आवाज काडून लेगीत संबंदीत अधिकारी कारवाय करिनात. सरकार पक्षाच्या आशिर्वादानूच हे प्रकार बिनधास्त सुरू आसात. महसूल खात्याचो आदेश हो लोकांची दिशाभूल करचे खातिरूच सरकारा कडल्यान काडला. सरकारान फाटल्या 13 वर्सांतली जमनीं पुरोवपाच्या प्रकारांचेर श्वेतपत्रिका काडची, अशी मागणी काँग्रेस फुडारी विजय भिके हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
