भांगरभूंय | प्रतिनिधी
-राज्यांत वट्ट 3304 बेकायदाे बांदकामापणजी : बर्च बाय रोमिओ लेन क्लबाक उजो लागले उपरांत राज्यात बेकायदा बांदकामां विशी सगळ्याक चर्चा सुरू आसा. पंचायतींनी बेकायदा बांदकामां मोडपाचे आदेश दिवन लेगीत पंचायत संचालनालयान दिल्ले स्थगितीक लागून आजून मेरेन चडशा बेकायदा बांदकामांचेर कारवाय जावंक ना. पंचायतींनी जे बेकायदा बांदकामांचो सोद घेतला तांतूत निम्म्या परस चड बांदकामां बार्देश म्हालातली आसा. राज्यातल्या पंचायतींनी वट्ट 3304 बेकायदा बांदकामा आसा. हाचे पयकी 1730 बांदकामां ही बार्देश म्हालातल्या पंचायतींनी आसा. पंचायत संचालनालयातल्या गोपां कडल्यान ही म्हायती मेळ्ळी.
हाका लागून क्लब, बार्रा वा हॉटेलां सील करपाचें प्रमाण हेर म्हाला परस बार्देसांत सगळ्यात चड आसतलें. बर्च बाय रोमिओ लेन क्लबाक फाटले शेनवारा उजो लागून 25 जाणांक मरण आयलें. हे घडणुकेचो तपास दंडाधिकारी समिती वरवीं सुरू आसा. उजो लागिल्लो बर्च बाय रोमिओ क्लबाचे बांदकाम बेकायदाे आशिल्ले. बनावट कबलातपत्रां सादर करून बर्चच्या धनयानी परवाने घेतिल्ल्याचे उक्तें जालां. हे फाटभुंयेर सरकारान बेकायदाे क्लब तशेंच पर्यटनसंबंदी आस्थापनांचेर कारवाय सुरू केल्या. हाचे खातीर म्हाल पांवड्याचेर समित्यो स्थापन जाल्या. आतां मेरेन दियाज (हणजूण) सीओ2 (वागातोर) ह्या क्लबांक सील केला. बांदकामा पाडपाच्या आदेशाक तत्कालीन पंचायत संचालकांनी स्थगिती दिल्ल्यान ती पाडप शक्य जाले ना. आतां अशा क्लबांक सील करपाची कारवाय सरकारान स्थापन केल्या समितीन सुरू केल्या. सोमारा काब द राम हांगा शॅका बदला हॉटेल उबारिल्ल्यान दी कॅप गोव ह्या हॉटेलाक सील मारले.
बर्च बाय रोमिओ लेन क्लबाक गरजेचें ते परवाने नाशिल्ले. उजो पालोवपी यंत्रणा फावो त्या तांकयेची नाशिल्ली. हाका लागून सरकारान तीन अधिकाऱ्यांक निलंबित केलां. निलंबीत केल्ल्यो सिद्धी हळर्णकार ह्यो बऱ्योच तेंप पंचायत संचालक आशिल्ल्यो. बर्च बाय रोमिओ लेन क्लबाक परवाने तांचे कार्यकाळांत मेळ्ळे. तशेंच दियाज, सीओ2 ह्या क्लबांक लेगीत पंचायतीन जारी केल्या डिमोलीशन आदेशाक तांच्या कार्यकाळांत स्थगिती मेळ्ळी.
बेकायदाे बांदकामांचो सोद घेवन तांचे आड कारवाय करपाची प्रक्रीया पंचायत पांवड्यार सुरूच आसता. पंचायत राज कायद्या खाला बेकायदाे बांदकामा आड कारवाय करपाचे अधिकार पंचायतींक आसा. बेकायदा बांदकाम मोडपाची नोटीस पंचायतीन जारी केले उपरांत संबंधीत नोटीशी आड पंचायत संचालनालया कडेन धाव घेतात.
पंचायत संचालनालयान स्थगिती दिले उपरांत कारवाय करप पंचायतीक शक्य जायना. उत्तर गोंयांत 2,179 जाल्यार दक्षीण गोंयांत 1,049 बेकायदाे बांदकामां विशीं पंचायत संचालनालया कडेन सुनावणी प्रलंबीत आसा. काय नोटिशींक स्थगिती दिल्या जाल्यार काय बांदकामां विशीं सुनावणी सुरू आसा.
पंचायतींनी सोदिल्ल्या 3,304 बांदकामां विशीं बार्देसांतल्या पंचायतींनी 1730 बेकायदाे बांदकामां आसा. हे प्रमाण लागी लागी 52 टक्के जाता. हाचे उपरांत फोंडें म्हालांत 712, तिसवाडीत 325, साश्टीत 290, काणकोणा 69, पेडण्यां 60, दिवचल म्हालांत 58, मुरगांवां 34, सत्तरीत 17, सांग्यां 5, धारबांदोडें 4 बांदकामांचो आस्पाव आसा. केपें म्हालांतल्या पंचायतींनी बेकायदाे बांदकामांचो सोद घेवंक ना. कागाळी येता, तसतशो पंचायती पंचायत सचिवां वरवीं पळोवणी करून तपासणी करता. पंचायतीन मान्यताय दिले उपरांत नोटिशी जारी जाता. बस्तोडें, कळंगुट, पोंबुर्पा, साल्वादोर द मुंद, गिरी, कांदोळी, आसगांव ह्या बार्देसांतल्या पंचायतींनी बेकायदा बांदकामांचे प्रमाण चड आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
