भांगरभूंय | प्रतिनिधी
हडफड्यां तिगांक जाल्यार गिरी तरणाट्याक मरण
म्हापशेंः राज्यांत अपघातांचें प्रमाण वाडत आसून शेनवारा बार्देस म्हालांत जाल्ल्या दोन वेगवेगळ्या अपघातांनी चवगांक मरण आयलें. पयलो अपघात हडफड्यां जालो. तातूंत तीन देशी पर्यटकांक मरण आयलें. जाल्यार एक रशियन पर्यटक गंभीर जखमी जालो. ह्या अपघाता उपरांत स वरांत दुसरो अपघात गिरी (नामोशी) चाररस्तो जंक्शना कडेन जालो. हातूंत एका तरणाट्याक मरण अायलें. बार्देस म्हालांत शेनवारा दोन अपघातांनी चवगांक मरण येवपाची घडणूक घडली.
मेळिल्ले म्हायती प्रमाण, हडफड्यां रशियन क्लबा मुखार शेनवारा फांतोड्डेर 3.30 वराच्या सुमाराक दोन मोटारी मदीं जाल्ल्या अपघातांत हैदराबादचे (तेलंगणा) दोन जाल्यार नाशिकांतलो एक अशा तिगां बिझनेसमनांक मरण आयलें. जाल्यार एक विदेशी पर्यटक गंभीर जखमी जालो.
महेश शर्मा (पिराय 48, नाशीक), दिलीपकुमार बांग (पिराय 46, हैदराबाद) आनी मनोजकुमार सोनी (पिराय 46, हैदराबाद) अशी मरण आयिल्ल्या पर्यटकांची नांवां आसात. जाल्यार एथोन बिचकाव्ह (पिराय 27) हो रशियन पर्यटक गंभीर जखमी जालो.
हैदराबाद आनी नाशिकांतल्यान चार इश्ट शुक्रारा 1 डिसेंबराक गोंयांत पर्यटना खातीर आयिल्ले. तांणी आपले वांगडा ड्रायव्हराक हाडिल्लो. हे पांचूय जाण रातीं हडफडेंतल्या रशियन क्लबांत गेले. तांणी टीएस 06 ईझॅड 1861 ही मोटार क्लबाच्या मुखारुच रस्त्याचे कुशीक पार्क केल्ली. कांय वेळान क्लबांतल्यान ड्रायव्हर भायर अायलो आनी मोटारींत बसलो. जाल्यार हेर चौगूय पर्यटक फांतोड्डेर 3.30 वराच्या सुमाराक क्लबांतल्यान भायर आयले. एकलो मुखा वयल्या सिटाचेर जाल्यार हेर तिग जाण फाटल्या सिटार बसपाचे तयारेत आशिल्ले.
मोटारीचें दार उक्तें करीत आसतना अचकींत फाटले वटेन जीए 03 झॅड 8001 ह्या क्रमांकाची पोलो मोटार भरधांव वेगांत आयली आनी मोटारीक नेटाचो धपको दिलो. हातूंत त्या तिगांय पर्यटकांक जाग्यारूच मरण आयलें.
चालक रामकुमार गणेश्वरराव हल्लाले (पिराय 43, हैदराबाद) आनी तांचो इश्ट सुरेश शर्मा (पिराय 48, हैदराबाद) हे अपघातांतल्यान वाटावले.
ही मोटार दुबावीत रशियन पर्यटक चलयतालो. धपको दिले उपरांत मोटार सुमार 50 मिटर अंतराचेर वचून व्हाळांत उमथून पडली. हातूंत रशियन पर्यटक गंभीर जखमी जालो. दोनूय मोटारींची लुकसाणी जाल्या.
जखमींक पयलीं म्हापशेंच्या जिल्हो हॉस्पिटलांत उपचारा खातीर दाखल केले. पणू थंय दोतोरांनी तांकां पयलीच मरण आयिल्ल्याचे सांगलें. जाल्यार गंभीर रशियन पर्यटकाक गोमॅकाँत दाखल केल्या.
हणजुणे पुलीस उपनिरिक्षक साहिल वारंग आनी हवालदार रुपेश शेटगांवकार हांणी हे घडणुकेचो पंचनामो केलो आनी कुडी पोस्टमार्टमा खातीर गोमॅकाँत धाडल्यात.
गिरी अपघातांत तरणाट्याक ट्रकापोंदा चिड्डून मरण
म्हापशेंः नामोशी, गिरी चाररस्तो जंक्शना लागसार ओव्हरटेक करतना ट्रकाच्या रोंदा पोंदा पडून विदेश विनोद पोळे (पिराय 23, पोडवाळ-खोर्जुवे) ह्या तरणाट्याक जाग्यारूच मरण आयलें. तो खाजगी आस्थापनांत कामाक आशिल्लो. हो अपघात शेनवारा सकाळीं 10.10 वरांच्या सुमाराक घडलो. विदेश पोळे हो जीए 03 एजी 1081 क्रमांकाचे दुचाकीन पर्राच्यान ग्रीनपार्कचे दिशेन वतालो. जाल्यार तेच दिशेन मुखा वयल्यान जीए 03 व्ही 0904 क्रमांकाचो ट्रक वतालो. नामोशी शाळे लागसार चाररस्तो जंक्शना कडेन ट्रकाक ओव्हरटेक करपाच्या यत्नांत दुचाकी चालक ट्रका पोंदा पडून ताका जाग्यारूच मरण आयलें.
म्हापशें पुलिसांनी विदेशाची कूड उत्तरीय तपासणे खातीर गोमॅकाँत धाडल्या.
ह्या प्रकरणांत ट्रक चालक रघुनाथ पवार (थिवी, मूळ कोल्हापूर) हाका पुलिसांनी भा.दं.सं.च्या 304 अ कलमा खाला गुन्यांव नोंदोवन अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
