भांगरभूंय | प्रतिनिधी
पणजी : बार्देसांत जमीन घोटाळ्यांचीं प्रकरणां आजूनय चालूच आसात. निल्ला जमीन नोंदींत आनीक एक व्हड विसंगती उक्ती जाल्या. शासन नियुक्त एसआयटी कडल्यान (SIT) खुबश्या प्रकरणांची चवकशी चालू आसतना ह्या नव्या प्रकाराक लागून महसूल नोंदींच्या विस्वासाचेर प्रस्न निर्माण जाला.
निल्ला एके मालमत्तेची नोंद दोन लागीं लागीं एका सारकिल्ल्या सर्व्हे नंबरा खाला केल्ल्याचें मुखार आयलां. संबंदीत मालमत्ता सर्वे नंबर ९८ १/ए आनी ९८ १ ए अश्यो दोन वेगवेगळ्यो नोंदी दिसतात. सोनूय नोंदींनी वेगवेगळे रावप्यांचीं नांवां नोंद आसात.
सर्व्हे नंबर ९८ १/ए विशींचें फॉर्म १ आनी १४ त मारिओ रॉय दो रोझारिया डी सोझा हांचें नांव रावपी म्हणून नोंद आसा. जाल्यार सर्वे नंबर ९८ १ ए च्या फॉर्म १ आनी १४त सम्यक मेटल्स प्रा. लि. हांचे सयत प्रशांत जेटली, संजय कुमार चौधरी आनी देवेंद्र कुमार स्वामी हांचीं नांवां रावपी म्हणून नोंद आसात.
हाका लागून महसूल विभागांतल्या अधिकार्यां मदींय बोवाळ निर्माण जाला. सर्व्हे आनी जमीन नोंदी निरीक्षक कार्यालयांतल्या अधिकार्यांनी सांगलें, तांचे नोंदींत फकत सर्वे नंबर ९८१ ए आसा. आमच्या कार्यालयांत एकूच सर्व्हे नंबर नोंद केला. फॉर्म १ आनी १४ जारी करपी मामलेदार कार्यालयांत कितें तरी तांत्रीक अडखळ आसपाक शकता, अशें एका अधिकार्यान सांगलें.
सर्व्हे आनी जमीन नोंदी निरीक्षक कार्यालयांतल्या अधिकार्यांनी सांगलें, तांच्या नोंदींत फकत सर्व्हे नंबर ९८ १ए दाखयता. आमच्या कार्यालयांत एकूच सर्व्हे नंबर नोंद केला. फॉर्म १ आनी १४ जारी करपी मामलेदार कार्यालयांत कितेंय तांत्रीक आडखळ आसपाक शकता, अशें एका अधिकार्यान नमूद केलें.
मात, मामलेदार कार्यालयांत चवकशी केले उपरांत प्रकरण अदेक घुस्पल्ल्याचें दिसून आयलें. संबंदीत लिपिकान अधिकृत प्रणाली तपासले उपरांत एकेच मालमत्ते खातीर दोनूय सर्व्हे नंबर प्रणालींत दिशिल्ल्याची कबुली दिली. म्हजे कारकिर्दीत पयलेच फावट अशें प्रकरण पळयतां. हे विशीं अदीक म्हायती मामलेदार दिवपाक शकतले, अशें तांणी सांगलें.
निल्ला प्रकरण हाताळपी जोड मामलेदार रुचिका बिर्जे हांचे कडेन संपर्क सादपाचो यत्न केलो तेन्ना, तांचे कडेन संपर्क जावपाक शकलो ना.
ह्या प्रकाराक लागून संबंदीत मालमत्तेच्या हक्कां विशीं आनी जमीन नोंदींच्या अचूकते विशीं गंभीर प्रस्न मुखार आयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
