भांगरभूंय | प्रतिनिधी
म्हापशें: फाटले दोन दीस पडपी उटंगाराच्या पावसाक लागून बार्देस म्हालांतली लोकजीण विस्कळीत जाली. चार घरांच्यो वण्टी कोसळ्ळ्यो, जाल्यार सात घरांचेंर झाडां पडलीं. कोलवाळच्या तळेश्वर राष्ट्रोळी मंदिरांत उदक घुसलें.
फाटल्या दोन दिसांत बार्देस म्हालांत पडझडीचो वट्ट 24 कॉल उजो पालोवपी दळा कडेन आयले. तातूंतले 19 कॉल म्हापशें कार्यालयांत नोंद जाल्यात.
पेन्हा दी फ्रान्क पंचायतींतल्या माटववाड्या वयल्या रघुनाथ रातबोले हांच्या रावता त्या घराची वणत कोसळ्ळी. फेअरा बाईक्सा म्हापश्यां तेंडुलकार निवास घराची वणत कोसळ्ळी. तशेंच गांवसावाडो म्हापशेंच्या गोलतेकार हांच्या घराची वणत कोसळ्ळी.
गावसावाडो म्हापश्यां गोलतेकार हांच्या घराची फाटली वणत कोसळ्ळी. ताका लागून पुराय घराक वेंरो गेल्यात. हें घर खंयच्याय खिणाक कोसळपाक शकता, असो भंय थळाव्या लोकांनी उक्तायल्या. ह्या चारूय दुर्घटणांनी सुमार पांच लाखांचें लुकसाण जालां.
गिरी, पर्रा, खोर्ली, कोलवाळे, आसगांव वाठारांत सात घरांचेर झाडां पडलीं. तातूंतलीं तीन झाडां उजो पालोवपी दळाच्या जवानांनी कांपून कुशीक काडलीं. जाल्यार हेर चार झाडां कुशळ व्यक्तींच्या आदारान कांपून घेवपाचो सल्लो घर धनयांक दिलो. तशेंच गिरी, आसगांवां, हणजूण्यां, पर्रा, थिये, कारोणा, आल्तीन म्हापश्या, दत्तवाडी म्हापश्यां, पिळर्णा, पोंबुर्फा, पैठण आनी पर्वरी वाठारांत झाडां वीज सरयां सयत रस्त्याचेर पडलीं. म्हापशें पिळर्ण आनी पर्वरी उजो पालोवपी दळाच्या जवानांनी हीं झाडां कांपून कुशीक काडलीं.
कोणीवाडो कोलवाळे व्हाळ तुंबिल्ल्यान पावसाचें उदक श्री तळेश्वर राष्ट्रोळी मंदिरांत घुसून लुकसाण जालें. राष्ट्रीय म्हामार्गाच्या रुंदीकरणा वेळार न्हंयेक जोडपी व्हाळाचें नियोजन करून बांदकाम करूंक ना. ताका लागून पावसाचें उदक योग्य तरेन व्हांवून वचना, ताका लागून ह्या वाठारांत उदक वयर सरता.
नामोशी गिरी सध्या पावसाचें उदक व्हांवून वचपाक आडखळ जाल्ल्यान पंचायत घर इमारती सयत ह्या वाठारांत हुंवारा सारकी स्थिती निर्माण जाल्या. हें उदक इमारतींत घुशिल्ल्यान पंचायत घर फाटल्या सप्तका सावन बंद दवरलां. पंचायत कार्यालय बंद आशिल्ल्यान लोकांची गैरसोय जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
