भांगरभूंय | प्रतिनिधी
एसआयटीची मागणी; परवानो रद्द करपाची प्रक्रिया सुरू
भांगरभूंय । प्रतिनिधी
पणजीः जमीन बळकावपाच्या प्रकरणांत मेल्ले व्यक्तीच्या नांवान बनावट कागदपत्रां तयार केल्ल्यान तशेंच नोटरी नेम मोडिल्ल्या प्रकरणांत विशेश चवकशी पंगडान (एसआयटी) बार्देसांतले महिला नोटरीचेर कारवाय करपाची मागणी सरकारा कडेन केल्या. ताका लागून संबंदीत महिला नोटरीचो परवानो रद्द करपाची प्रक्रिया कायदो खात्यान सुरू केल्ल्याची म्हायती मेळ्ळ्या.
बनावट कागदपत्रांच्या आदारान सरकारी तशेंच खाजगी जमीन टोळये वरवीं बळकायिल्ल्याचीं खूबशीं प्रकरणां उजवाडाक आयली. ते उपरांत तांकां ताब्यांत घेवचे खातीर राज्य सरकारान 15 जून 2022 ह्या दिसा आयपीएस अधिकारी निधीन वाल्सन हांच्या फुडारपणा खाला एसआयटीची थापणूक केली. एसआयटीन 18 जूनाक तपास सुरू करून ह्या प्रकरणांत पयली अटक केल्ली. ते उपरांत अशा प्रकरणांतल्या जमनी विशीं कायदेशीर निर्णय घेवचे खातीर सरकारान निवृत्त न्यायाधीश व्ही. के. जाधव हांच्या फुडारपणा खाला चवकशी आयोगाची थापणूक केल्या.
ह्या प्रकरणांत एसआयटीन आतां मेरेन 45 दुन्यांव दाखल करून 19 दुबावितांक अटक केल्या. अटक केल्ल्या दुबावितांची चवकशी केली तेन्ना दुबावितांनी 93 जमनी संबंदांत बनावट कागदपत्रां तयार करून त्यो बळकायिल्ल्याचें मुळावे चवकशेंत मुखार आयलां. ते भायर अटक केल्ले टोळयेन वयले जमनी संबंदांत 145 विक्री पत्रांची नोंदणी उपनिबंधक कार्यालयांत केल्ल्याची म्हायती मुखार आयल्या. तातूंतले प्रथमदर्शनी तीन गुन्यांवांनी बार्देसांतली एक महिला नोटरीन मेल्ले व्यक्तीच्या नांवान कागदपत्रां तयार केल्ल्याचें मुखार आयलां. ते भायर एसआयटीन संबंदीत नोटरीक चवकशे खातीर आपयली तेन्ना नोंदणी चोपडेंत फेरफार केल्ल्याचें दिसलें. ते भायर संबंदीत नोटरीन अधिकाराचो गैरवापर करून विक्री पत्र, प्रतिज्ञापत्र तशेंच हेर कागदपत्रां उपनिबंधक, मामलेदार कार्यालयांत जमीन नोंदणी वा हेर दस्तावेज तयार करपा खातीर सादर केल्ल्याचें मुखार आयलां. तेचप्रमाण संबंदीत व्यक्ती भायर पडिल्ली आसतनाय तिच्या नांवान दुसरे व्यक्तीक मुखत्यार पत्र तयार करून जमनीची विक्री करपांत वांटो आशिल्ल्याचें मुखार आयलां. हाची दखल घेवन एसआयटीन राज्य निबंधका कडेन कारवाय करपा संबंदांत पत्र वेव्हार केला. ताची दखल घेवन निबंधकान फुडली प्रक्रिया करचे खातीर कायदो खात्या कडेन अहवाल धाडिल्ल्याची म्हायती मुखार आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
