भांगरभूंय | प्रतिनिधी
पणजी : पार्ट टायम नोकरेची ऑफर दिवन गुगलाचेर दरेका रेटिंगाक ४० रुपयांचो परतावो दिवपाचें हांयस दाखोवन वेरे- बार्देसच्या एका तरणाट्याक वट्ट ९ लाख ५० हजार रुपयांक तोपी घाली. ह्या प्रकरणांत पर्वरी पुलिसांनी मुंबयच्या २६ वर्सां पिरायेच्या तरणाट्याक अटक केल्या. आरोपीन पिडेस्ताक टेलिग्राम अॅपार कामाच्या स्वरूपाची म्हायती दिली आनी उपरांत तांचे कडल्यान जायत्या वेव्हारा वरवीं बरेच दुडू फारायले.
नेमकें प्रकरण कितें?
पर्वरी पुलीस स्टेशनांत वेरेंच्या तरणाट्यान दिल्ले कागाळे उपरांत ५ जून २०२५ दिसा भारतीय न्याय संहिता कलम ३१९(२) आनी आयटी कायदो कलम ६६(डी) खाला एफआयआर नोंद केली. २५ मे ते २ जून मजगतीं पिडेस्ताक गूगल रेटिंग दिवपाचें पार्टटायम जॉब दिवपाचें हांयस दाखयलें. दरेका रेटिंगा खातीर ४० रुपया दिवपाचें थारिल्लें. उपरांत ताका टेलिग्राम ऍप डावनलोड करून कांय टासक पुराय करपाक सांगले. उपरांत ताचेर विस्वास दवरून विवीध कारणांक लागून वट्ट ९,५०,१४९ रुपया जी-पे, एटीएम ट्रान्सफर आनी हेर तरेन घेतले.
पर्वरी पुलिसांनी तांत्रीक तपासा खाला खुबश्या बँक खात्यांचें आनी मोबायल नंबर्सचें विश्लेशण केलें तेन्ना ह्या फटींगपणांत जायत्या जाणांचो आसपाव आशिल्ल्याचें उक्तें जालें. उपरांत पुलिसांनी तांत्रीक पाळत दवरून मुंबयत आरोपीक सोदून काडलो. २८ जून २०२५ दिसा पर्वरी पुलीस स्टेशनाचे पुलीस उपनिरीक्षक अरुण शिरोडकार, पुलीस कॉन्स्टेबल अक्षय नावेलकार, हेमंत गांवकार आनी ऋषिकेश शेटगांवकार हांणी मुंबय वचून आरोपीक ताब्यांत घेतलो. अटक केल्ल्या आरोपीचें नांव जगदीश बोकोलिया (२६). तो आदर्श नगर, शेल कॉलनी रोड, चेंबूर-मुंबय हांगा रावता.
ह्या प्रकरणाचो फुडलो तपास उत्तर गोंयचे पुलीस अधीक्षक राहुल गुप्ता आनी पर्वरेचे उपअधीक्षक विश्वेश कर्पे हांच्या मार्गदर्शना खाला तशेंच पर्वरी पुलीस स्टेशनाचे निरीक्षक राहुल परब हांच्या नेतृत्वा खाला सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
