भांगरभूंय | प्रतिनिधी
मुरगांव पालिकेन कोयर काकोडाच्या प्रकल्पांत धाडपाचो घेतलो निर्णय
मुरगांव: बार्देश, साळगांवच्या कोयर प्रकल्पान वोलो कोयर स्विकारपचें बंद केल्ल्यान निर्माण जाल्ली समस्या सोडोवपाक मुरगांव पालिकेन कोयर काकोडाच्या प्रकल्पांत धाडपाचो निर्णय घेतला.मात हे खातीर म्हयन्याक सुमार १२ लाखांचो खर्च येतलो, पालिकेची अर्थीक स्थिती वायट आशिल्ल्यान हो खर्च उखलपा खातीर सरकारा कडेन विशेश अनुदानाची मागणी करपाचो निर्णय पालिका मंडळाचे बसकेंत घेतला.
राज्य घनकचरा वेवस्थापन महामंडळान साळगांव प्रकल्पांत वोलो कोयर स्विकारपाक न्हयकार दिल्ल्यान मुरगांव पालिकेचेर पेंच आयला. हाचेर चर्चा करपा खातीर नगराध्यक्ष गिरीश बोरकार हांचे अध्यक्षते खाला आपत्कालीन बसका आपयिल्ली. मुरगांव पालिका मंडळाच्या आपत्कालीन बसकेंत उलयतना नगराध्यक्ष गिरीश बोरकार.वांगडा मुख्याधिकारी सिद्धीविनायक नायक आनी हेर.
विशेश म्हळ्यार, मुरगांव पालिकेन म्हयन्या आदीं साळगांवच्यान कोयर व्हरपा खातीर १६ टन तांकीचें विशेश वाहन विकतें घेतिल्लें. हया वाहनाक लागून एकेचे फेरींत कोयर पावोवं येतालो आनी कोयरांतलें घाणयारें उदक रस्त्यार पडचें न्हय म्हूण स्वतंत्र टाकयेची वेवस्थाय आशिल्ली. मात आतां काकोडा प्रकल्पाचें १० टन क्षमतेचें वाहन वापरपाची तांक आशिल्ल्यान पालिकेचे हे नवें वाहन वापरा बगर पडून उरिल्ल्यान ती पेड्यार जावपाचो भंय उक्तायतना दिसता.
काकोडा प्रकल्पांत कोयर धाडपाक पालिकेक दर म्हयन्याक सुमार १२ लाख रुपयां परस चड खर्च येतलो. पालिकेंत सदांच १६ टन वोलो कोयर जमा जाता, जो म्हयनोभर ४२६ टना मेरेन पावता. काकोडा प्रकल्पाचे एके फेरी खातीर २४,२२८ रुपा खर्च अपेक्षीत आसा. ही रक्कम घन कोयर वेवस्थापन महामंडळाकडेन पयलींच जमा करची पडटली, वायट अर्थी परिस्थिती आशिल्ले पालिकेन सरकारकडेन अनुदानाची मागणी करपाचो निर्णय घेतला. सध्या तात्पुरतो तोडगो म्हणून एका म्हयन्या खातीर कोयर काकोड्यां धाडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
