भांगरभूंय | प्रतिनिधी
खबरां संस्था
मेलबर्नः ऑस्ट्रेलियेंत टी-20 वर्ल्ड कप सर्तीच्या वेळार आंतरराष्ट्रीय क्रिकेट परिशदेक नवो अध्यक्ष मेळ्ळो. न्यूझिलंड क्रिकेट बोर्डाचे संचालक आनी वकील ग्रेगर बार्केलेक परत एक फावट आयसीसीचो अध्यक्ष केला. शेनवारा एकमतान तांका अध्यक्ष म्हणून वेंचून काडलें. बीसीसीआयचो सचीव जय शाह आयसीसीचे अर्थीस समितीचो मुखेली आसतलो.
झिम्बाब्वेचो तवेंगवा मुकुहलानी आयसीसी अध्यक्षपदाची वेंचणूक लडयतले अशें सांगताले. मात तांणी आपलें नांव फाटीं घेतगीर अध्यक्षपदाची निवड विरोधाविणे जाली. बार्कले फुडली दोन वर्सां आयसीसीचे अध्यक्ष आसतले. ऑकलंडाचे बार्कले 2020 वर्सा पयले खेप आयसीसी अध्यक्ष जाल्ले. 2015चे वन-डे वर्ल्ड कप सर्तीचे ते संचालक आशिल्ले.
आयसीसी अध्यक्षपदाचे सर्तींत बीसीसीआयचो आदलो अध्यक्ष सौरव गांगुली हांचेंय नांव आशिल्लें. बीसीसीआयचे वेंचणूके पयलीं गांगुली आयसीसीचो अध्यक्ष जातलो अशें दिसतालें. जगमोहन डालमिया, शरद पवार, एन श्रीनिवासन आनी शशांक मनोहर हाचे पयलीं आससीसीचे अध्यक्ष आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
