भांगरभूंय | प्रतिनिधी
मुख्यमंत्रीः पांवड्या पांवड्यांनी लायतले चालीक
पणजीः अंदूंच्या अर्थसंकल्पांत तरदूत करून बाराय म्हालांनी पांवड्या पांवड्यांनी खेलो इंडियाचीं केंद्रां चालीक लायतले. ज्या खेळां संघटणांनी निधी वापर प्रमाणपत्र दिलां तांचो उरिल्लो निधी तांकां आॅक्टोबर पयलीं दितले अशें मुख्यमंत्री डॉ. प्रमोद सावंत हांणी जाहीर केलें.
गोंयांत जाल्ल्या राष्ट्रकूल खेळांत गोंयचे खेळगडे खुबश्या खेळांनी पात्र थारून खूबशीं पदकां हाडिल्लीं. पूण जेन्ना राष्ट्रकूल खेळां सर्त उत्तराखंडांत जाल्ली तेन्ना गोंयकार खेळगडे फक्त 19 खेळांनी पात्र थारले आनी 11 पदकां मेळयलीं. खेळां संघटणेक फावो ती मजत आनी अनुदान मेळूंक नाशिल्ल्यान कामगिरीत उणाव जालाे असो आरोप फातोड्डेंचे आमदार विजय सरदेसाय हांणी केलो.
ह्या अनुदान वांटपांत गोलमाल दिसून आयला. ज्या खेळांनी खेळगडे नात तांचे संघटणेक चड अनुदानाचें वांटप केलां आनी ज्या खेळांनी भरपूर खेळगडे आसात तांचे संघटणेक खूब उणें अनुदानाचें वांटप जालां असो दावो सरदेसाय हांणी करून कांय खेळां संघटणांचीं नांवां सयत आनी तांकां दिल्ल्या निधी सयत म्हायती दिली.
फुटबॉला सारक्या खेळाक खूब कमी निधीचें वांटप केलां. फुटबॉला सारक्या राज्य खेळाक सरकार फाटल्या चार वर्सांत 74 लाख दिवपाचे आसात आनी तातूंतले अर्दे दिता म्हूण सांगून सरकारान फक्त 2.5 लाख इतलोच निधी दिला. ते भायर गोंय फुटबॉल संघटणेचो 11.51 कोटी इतलो निधी थकला. सरकारान राज्य खेळाक पयशे दिवंक ना असो आरोप सरदेसाय हांणी केलो.
ज्या खेळां संघटणांनी वापर प्रमाणपत्र दिवंक ना तांचेच अनुदान आडावन उरलां. फुटबॉल संघटणेन अजून मेरेन निधी वापर प्रमाणपत्र दिवंक नाशिल्ल्या कारणान हें अनुदान उरलां अशी मुख्यमंत्र्यांनी जाप दिली. हे विशीं हरकत घेवन सरदेसाय हांणी सांगलें, फुटबॉल संघटणेन वापर प्रमाणपत्र दिलां आनी हे विशींचीं कागदपत्रां तांणी संघटणे कडल्यान घेतल्यात.
जर फुटबॉल संघटणे सयत ह्या खेळां संघटणांनी वापर प्रमाणपत्र दिलां आसत जाल्यार तितल्या जाणांचें अनुदान मंजूर करतां. ज्या खेळा संघटणा कडल्यान वापर प्रमाणपत्र मेळ्ळे उपरांतच त्या संबंदीत खेळां संघटणेक ऑक्टोबर पयलीं अनुदान दितले अशें आस्वासन मुख्यमंत्र्यांनी दिलें.
खेलो इंडिया खेळांत गोंयच्या बाबत कामगिरीचेर उजवाड घालीत सरदेसाय हांणी म्हणलें की, खेलो इंडिया केंद्रां फक्त सांखळी आनी फोंडें वाठारांत आसात. गोंयभरचीं भुरगीं हांगा कशीं पावतलीं. ते भायर सरकारान फाटल्या अर्थीक वर्सांत फक्त 6 कोटी इतलो खर्च ह्या केंद्राचेर केला.
आतां मेरेन फक्त म्हाल पांवड्यार 2 खेलो इंडिया केंद्रां उबारल्यांत. अंदूंच्या अर्थसंक्लपांत तरतूद करून गोंयच्या दरेक म्हालांनी पांवड्या पांवड्यान खेलो इंडिया केंद्रां उबारतले. सगल्या खेळां संघटणांक सुवात सोदपाक सांगल्या. सरकाराचीं 135 मैदानां आसात. तातूंतलें खंयचेंय एक मैदान हें एका थारावीक खेळा खातीर तयार करून संघटणेक दिवपाची सरकाराची तयारी आसा अशें आस्वासन मुख्यमंत्र्यांनी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
