भांगरभूंय | प्रतिनिधी
सगल्यांत चड बालरथ डायोसेशन संस्थेक: मुख्यमंत्री
पणजी: गांवांतल्या कांय भुरग्यांक शिक्षणा खातीर पयसुल्लो प्रवास करून शाळेंत वच्चें पडटा. तशेंच कांय गांवांनी वाहनांचो उणाव आशिल्ल्यान भुरगीं शाळेंत उसरां पावतात. हे खातीर सरकारान खास करून गांवांतल्या विद्यार्थ्यां खातीर बालरथ येवजण चालीक लावन कांय शाळांक बशी दिल्यो. शिक्षण खात्याचे आंकडेवारी प्रमाण गोंयांतल्या बाराय म्हालांनी वट्ट 398 बालरथ विवीध आस्थापनांक दिल्यात अशें आमदार आलेक्स रेजिनाल्ड हांणी विचारिल्ल्या लेखी प्रस्नाक शिक्षण मंत्री ह्या नात्यान मुख्यमंत्री डॉ. प्रमोद सावंत हांणी जाप दिली.
गोंयांत सगल्यांत चड बालरथ डायोसेशन शिक्षण संस्था चलयत आशिल्ल्या स्कुलांक दिल्यात. तशेंच हेर खाजगी शिक्षण संस्थां चलयत आशिल्ल्या स्कुलांक, उच्च माध्यमीक आनी विशेश भुरग्यांच्या स्कुलांक बालरथ दिल्ल्याचें मुख्यमंत्र्यांनी लेखी जापेंत म्हणलां.
शिक्षण खात्याचीं सरकारी स्कुलां तशेंच उच्च माध्यमीक स्कुलां बलरथ बशीचो वापर करिनाशिल्ल्याचें तांणी दिल्ले जापेंतल्यान समजता.
गोंयांतल्या बारा म्हालां मदल्या साश्ट म्हालांत वट्ट 54 शिक्षणीक आस्थापनांक 70 बालरथ दिल्यात. जाल्यार सगल्यांत उणें सांगें म्हालांतल्या पांच शिक्षणीक संस्थाक सात बालरथ दिल्यात. जाल्यार दुसऱ्या क्रमांकाचेर बार्देस म्हाल आसा. ह्या म्हालांतल्या 55 शिक्षणीक आस्थापनांक 62 बालरथ दिल्यात. तशेंच सत्तरी म्हालांतल्या आठ आस्थापनांक 12 बालरथ दिल्यात.
स्कुलांनी आपल्या बालरथांची संख्या आनी बालरथांतल्यान येवपी भुरग्यांची संख्या पळयत जाल्यार प्रस्न असो उप्रासता की, एका बालरथांत बसपाची तांक 29 वा 30 बसकांची आसता. सत्तरींतल्या एका उच्च माध्यमीक विद्यालयांत एकूच बालरथ आसा. स्कुलांत वट्ट 763 भुरगीं आसात. तीं सगलीं ह्या बालरथाचो वापर करतात. तेच बराबर चडशा आस्थापनांनीय होच प्रकार चालू आसा अशें जापेंत म्हणलां.
सरकारी आदेशा प्रमाण ह्या बालरथाची भुरग्यांक घेवन येवपाची मर्यादा फक्त तीन किलोमिटराची आसा. जाल्यार कांय आस्थापनां खास करून गांवांतलीं 10 ते 15 किलोमिटर मेरेन भुरग्यांक हाड-व्हर करतात. ताका लागून गांवांतल्यो सरकारी शाळा बंद पडपा फाटल्यान बालरथ हें एखादें कारण आसूंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
