बारावेच्या निकालाची वाडटी टक्केवारी कायम

भांगरभूंय | प्रतिनिधी

अंदूं 92.96 टक्के विद्यार्थी पास

चल्यां परस चलयोच मुखार

23 विद्यार्थ्यांचे निकाल दवरल्यात राखून

भांगरभूंय । प्रतिनिधी

पणजी : पोरूंचे तुळेंत अंदूं बारावेचे परिक्षेंत 2.33 टक्के अदीक विद्यार्थी पास जाल्यात. पोरूं बारावेचो निकाल 90.64 टक्के लागिल्लो. अंदूं तो वाडून 92.96 टक्के जाला. अंदूं परिक्षेक वट्ट 17 हजार 283 विद्यार्थी बशिल्ले. तातूंतले 16 हजार 67 जाण पास जाले. जाल्यार 23 विद्यार्थ्यांचे निकाल राखून दवरल्यात. बारावेच्या निकालांत अंदू लेगीत चलयोच मुखार आसात. चलयांचो निकाल 93.93 टक्के जाल्यार चल्यांचो निकाल92.89 टक्के लागला. गोंय शालांत मंडळाचे अध्यक्ष भगीरथ शेट्ये हांणी शेनवारा पर्वरे घेतिल्ले पत्रकार परिशदेंत ही म्हायती दिली. ह्या वेळार सचीव विद्यादत्त नायक आनी सहसचीव भारत चोपडे हाजीर आशिल्ले.

अंदूं 10 फेब्रुवारी ते 27 मार्च ह्या काळांत 20 केंद्रांचेर बारावेची परिक्षा जाल्ली. परिक्षेक बशिल्ल्या वट्ट विद्यार्थ्यां मदीं 9080 चलयो जाल्यार 8203 चले आशिल्ले. वट्ट चल्यां मदले 7538 जाण पास जाले, जाल्यार परिक्षा दिल्ल्या चलयांतल्यो 8529 जाणां पास जाल्यो. अभ्यासक्रमा प्रमाण पळयत जाल्यार हेर फांट्यां परस विज्ञान फांट्यांतले विद्यार्थी चड येसस्वी थारले. ह्या फांट्याच्या 5428 विद्यार्थ्यांनी परिक्षा दिली. तातूंत 5097 (93.90 टक्के) विद्यार्थी पास जाले. कला फांट्यांतल्या 4110 विद्यार्थ्यां मदले 3790 (92.21 टक्के) विद्यार्थी पास जाले.

ते भायर अंदूं वाणिज्य फांटल्या 5313 मदले 4936 विद्यार्थी पास (92.90 टक्के) पास जाले. व्होकेशनल कोर्स करपी 2432 विद्यार्थांनी परिक्षा  दिल्ली. तातूंतले 2244 म्हणल्यार 92.27 टक्के पास जाले. अंदूंचे परिक्षेंत 139 खाजगी उमेदवारांक संद दिल्ली. तातूंतले 59 जाण (42.45 टक्के) पास जाले. अंदूं बारावेची परिक्षा परतून दिल्ल्या (रिपिटर) विद्यार्थ्यांची संख्या 502 आशिल्ली. तातूंतले 245 (48.80 टक्के) पास जाले, जाल्यार 888 मदले 850 दिव्यांग विद्यार्थी पास जाले. ही टक्केवारी 95.72 टक्के आसा.

अंदूंचे परिक्षेंत 550 विद्यार्थ्यांक 33 ते 45 टक्के गूण मेळ्ळे. 46 ते 59 टक्के गूण मेळोवपी विद्यार्थ्यांची संख्या 5201 आशिल्ली. 60 ते 80 टक्के गूण घेवपी विद्यार्थ्यांची संख्या सगल्यांत चड म्हणल्यार 8280 आशिल्ली. जाल्यार 81 ते 100 टक्के गूण घेवपी विद्यार्थ्यांची संख्या 2035 आशिल्ली. अंदूं 2626 विद्यार्थ्यांनी खेळां गुणांची सुविधा घेतली. अशे गूण घेवन 87 विद्यार्थी पास जाले. हे पद्दतीन पास जाल्ल्या विद्यार्थ्यांची टक्केवारी 0.45 आशिल्ली.

परिक्षेंत वट्ट 1193 विद्यार्थ्यांनी आपले गूण सुदारप (निड्स इम्प्रुव्हमेंट) गरजेचें आसा, अशा विद्यार्थ्यां खातीर सादारणपणान 27 एप्रीलाक आनीक एक परिक्षा घेतले. ते भायर पास विद्यार्थ्यांक आपले गूण वाडोवचे खातीर लेगीत हे संदीचो फायदो घेवपाक मेळटलो. गुणांची पडटाळणी, उत्तर प्रत्रिकेचे पुनर्मुल्यांकन हे खातीर ऑनलायन पोर्टल 27 मार्च सावन सुरू जातलो. हे खातीर विद्यार्थ्यांक तांचे शाळे वरवीं विनवणी अर्ज करचे पडटले.

अंदूं धावेचो निकाल सादारणपणान 15 एप्रीला उपरांत जाहीर करतलो. जाल्यार फुडल्या वर्सा बारावेची परिक्षा 11 फेब्रुवारी मेरेन घेतले, अशें शेट्ये हांणी सांगलें.

पेडणें म्हालाचो निकाल सगल्यांत चड

म्हाला प्रमाण पळयत जाल्यार पेडणें म्हालाचो निकाल सगल्यांत चड म्हणल्यार 95.97 टक्के लागला. ते परांत साश्टी (95.17 टक्के), तिसवाडी (95.11 टक्के), बार्देस (95.02 टक्के), काणकोण (94.14 टक्के), दिवचल 92.95 टक्के) केपें (92.86 टक्के), मुरगांव (91.70 टक्के), फोंडें (90.01 टक्के) ह्या म्हालांचो नंबर लागता. जाल्यार धारबांदोडें (79.57 टक्के), सत्तरी (79.80 टक्के) आनी सांगें (82.78 टक्के) हांगाचो निकाल तुळेंत उणो लागला.

अर्थशास्त्र थारलो कठीण विशय

विशयां प्रमाण पळयत जाल्यार अर्थशास्त्र हो विशय सगल्यांत कठीण थारला. तातूंत पास जावप्यांची टक्केवारी 94.44 इतली आसा. अकावंटन्सींत 95.10 टक्के, गणितांत 95.41 टक्के विद्यार्थी पास जाले. संस्कृत आनी बँकींग ह्या विशयांत पास जावपाचें प्रमाण 100 टक्के आसा. वट्ट 157 विद्यार्थ्यांनी विवीध विशयांत 100 तले 100 गूण मेळयले.

चॅट जीपीटी वापरपाचो यत्न

परिक्षे वेळार दोन विद्यार्थ्यांनी परिक्षा केंद्रांत मोबायल व्हेल्लो. तातूंतल्या एका विद्यार्थ्यान प्रस्न पत्रिकेचो फोटो काडून तो चॅट जीपीटीचेर अपलोड केलो. मात ताच्यो जापो मेळचे आदींच दोनूय फोन जप्त केले. दोनूय विद्यार्थ्यांक शुन्य गूण दिवपाचो निर्णय घेतला, अशें भगीरथ शेट्ये हांणी सांगलें.