भांगरभूंय | प्रतिनिधी
90.64 टक्के विद्यार्थी पास; अंदूंय चलयोच मुखार
भांगरभूंय । प्रतिनिधी
पणजी : पोरूंचे तुळेंत अंदूं बारावेचे परिक्षेंत 5.6 टक्के अदीक विद्यार्थी पास जाले. पोरूं बारावेचो निकाल 85 टक्के लागिल्लो. अंदूं तो वाडून 90.64 टक्के जाला. अंदूंचे परिक्षेंत वट्ट 17 हजार 686 विद्यार्थी बशिल्ले. तातूंतले 16 हजार 30 विद्यार्थी पास जाले. बारावेंच्या निकालांत अंदूं लेगीत चलयोच मुखार आसात. चलयांचो निकाल 92.42 टक्के जाल्यार चल्यांचो निकाल 88.69 टक्के लागला. गोंय शालांत मंडळाचे अध्यक्ष भगीरथ शेट्ये हांणी बिरेस्तारा जाल्ले पत्रकार परिशदेंत ही म्हायती दिली. ह्या वेळार सचीव विद्यादत्त नायक आनी सहसचीव भारत चोपडे हाजीर आशिल्ले.
अंदूं 10 फेब्रुवारी ते 1 मार्च ह्या काळांत बारावेची परिक्षा जाल्ली. परिक्षेक वट्ट 8462 विद्यार्थी बशिल्ले. तातूंतले 7505 जाण पास जाले. पास जावपाची टक्केवारी 88.79 टक्के आशिल्ली. जाल्यार परिक्षा दिल्ल्या वट्ट 9224 चलयां मदल्यो 8525 चलयो पास जाल्यो. चलयांची पास जावपाची टक्केवारी 92.42 आशिल्ली.
अभ्यासक्रमा प्रमाण पळयत जाल्यार हेर फांट्या परस वाणिज्य फांट्यांतले विद्यार्थी येसस्वी थारले. वाणिज्य फांट्याच्या 5085 विद्यार्थ्यांनी परिक्षा दिल्ली. तातूंतले 4745 (93.31 टक्के) विद्यार्थी पास जाले. जाल्यार 340 विद्यार्थ्यांक सुदारणा करप गरजेचें आसा. कला फांट्यांतल्या 4068 विद्यार्थ्यां मदले 3703 (91.03 टक्के) विद्यार्थी पास जाले. विज्ञान फांट्यांतल्या 5085 तले 4745 विद्यार्थी पास जाले. ते भायर व्होकेशलन कोर्स करपी 2447 विद्यार्थ्यांनी परिक्षा दिल्ली. तातूंतले 2024 म्हणल्यार 82.71 टक्के विद्यार्थी पास जाले. अंदूंचे परिक्षेंत 138 खाजगी उमेदवारांक संद दिल्ली. तातूंतले 37 जाण (26.81 टक्के) पास जाले. आयटीआय केल्ल्या 47 विद्यार्थ्यांनी बारावेची परिक्षा दिली. तातूंतले 37 जाण (78.72 टक्के) पास जाले, अशें शेट्ये हांणी सांगलें.
तिगांचे निकाल राखून
अंदूं तीन विद्यार्थ्यांनी कागदपत्रांची पुर्तता करूंक नाशिल्ल्यान मंडळान तांचे निकाल राखून दवरल्यात. अंदूं 3066 विद्यार्थ्यांनी खेळा गुणांचो फायदो घेतिल्लो. तातूंतले 126 जाण हे गूण वापरून पास जाले. पास जावपाचें प्रमाण 0.71 टक्के आशिल्लें. अंदूं बारावेची परिक्षा परतून दिवपी (रिपिटर) विद्यार्थ्यांचें पास जावपाचें प्रमाण 54.38 टक्के आसलें. जाल्यार 198 तले 166 दिव्यांग विद्यार्थी (83.84 टक्के) पास जाल्ल्याचें अहवालांत म्हणलां.
पडटाळणी खातीर 12 एप्रील मेरेन मुजत
बारावेच्या निकाला विशीं उत्तर पत्रिकेची फोटो कॉपी मेळोवचे खातीर 5 एप्रील जाल्यार पडताळणी आनी गूण तपासणे खातीरची निमाणी तारीख 12 एप्रील आसा. विद्यार्थ्यांनी हे संबंदांत तांचे शाळे वतीन विनवणी करप गरजेचें आसा.
जनरल फावंडेशन, भुगोल थारले कठीण विशय
मंडळान जारी केल्ल्या अहवाला प्रमाण अंदूं विद्यार्थ्यांक जनरल फावंडेशन कोर्स, भुगोल आनी भौतीकशास्त्र हे विशय कठीण गेले. जनरल फावंडेशन कोर्सांत पास जावपाचें प्रमाण सगळ्यांत उणें म्हणल्यारय 88.29 टक्के आशिल्लें. भुगोल विशयांत 89.12 टक्के आनी भौतीकशास्त्र विशयांत 89.35 टक्के विद्यार्थी पास जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
