भांगरभूंय | प्रतिनिधी
गों य शालांत मंडळान अंदूं धावेचो निकाल वेगीं लायलो. ताका लागून मंडळाक परबीं. सगले विद्यार्थी, पालक खूश जाल्यात. कारण तांकां आतां इकरावेक वा हेर कडेन प्रवेश घेवपाक मात्तूय त्रास जावचो ना. बारावेचो निकाल तर हाचे पयलींच लागला. ते विद्यार्थी फुडल्या प्रवेशा खातीर काॅलेजींनी वचपाक लागल्यात. गोंयांत सुमार 10 हजार सुवाती आसात. सगलेच प्रवेश घेतले अशें ना. थोडे गोंया भायरुय वतले. मडगांवच्या सरकारी महाविद्यालयाची गजाल मुद्दाम सांगपाक जाय. थंय सगले तरेचें शिकप मेळटा. तरी बड्डेंचे काॅलेजीची गजालूच वेगळी. व्होकेशनलाचो भुरगो फुडल्या वर्सा प्रवेश घेता तो वाणिज्य शाखेंत. पूण हे काॅलेजींत तुमकां बीएससी संगणक करूंक मेळटा. सरकारी काॅलेज आशिल्ल्यान फी लेगीत उणी आसा. ती परवडपा सारकी आसा, अशें म्हणप चड बरें.
बड्डें- मडगांवच्या काॅलेजीचे प्राचार्य एफ नदाफ हे भुरग्यांची जतनाय घेवपी, तांकां मुखार काडपी प्राचार्य. गोंयात व्होकेशनल विद्यार्थ्यांक वाणिज्य फांटो सोडल्यार वेगळो कोर्स घेवपाचो पर्याय उणो आसा. ताकाच लागून बरेच विद्यार्थी वाणिज्य फांटो घेतान. ते दुसरी वाट स्विकारतात. डेटा सायन्स हो नवो कोर्स. तुमकां आवड आसा जाल्यारुच तो शिकचो. वास्कोचे एमईएस काॅलेजींत लाॅजिस्टीक हो कोर्स आसा. ताचो लेगीत तुमकां विचार करूं येता. हो सगल्या काॅलेजींनी आसा. कोर्स विविध तरांचे आसतात. पूण आपणाक आवडटा तो कोर्स वेंचून काडप करियराचे नदरेन म्हत्वाचें. कांय काॅलेजींनी संयुक्त कोर्स आसतात. कोर्स खंयचोय आसूं, तुमी स्वताचो विचार करपाक जाय. तुमचे इश्ट, इश्टिणी वतात, थंय तुमी गेले जाल्यात तुमची निवड चुकपाक शकतका. शेवटाक तुमीच तुमचे करियर करतले न्हय?
आमची एक वायट मानसिकताय आसा, ती म्हणल्यार नोकरीच करतलो. ती लेगीत सरकारी. उद्देजक जावपाक आमी कशेच तयार आसनात. आडवाद दुकानां, घरचे उद्देग, वेवसाय आशिल्ले तरणाटे सोडून. नोकरीच कित्याक अशें कोणाकूय विचारीत जाल्यार ताचे कडेन समाधानकारक जाप नासता. कांय जाण सुरक्षा, कांय जाण बरो पगार म्हणटात. थोड्यांक काम चड नासता, अशें दिसता. जेन्ना तुमी खंयच्याय फांट्यांत प्रवेश घेतात. तेन्ना बारीकसाण तर जायच. पूण खेरीज अभ्यासूच जाय. बारावी पास जाल्ल्या विद्यार्थ्यांक आवडीचो फाटो घेवंक मेळटा. फक्त सायन्स सोडून हेर फांट्याच्या विद्यार्थ्यांक दोतोर जावंक मेळा. पूण बड्डें काॅलेज डेटा सायन्स हो कोर्स मागणी आशिल्लो आसा. थंय कुशळटायेक भरपूर मागणी आसा. देखीक थंय डीटीपी, शिवण काम, अन्न निर्मणी, लायनमन अशे आयटीआयचे कुशळटायेचे अभ्यासक्रम आसा. बरी गजाल म्हणल्यार बीकाॅम, बीएससी, डेटा सायन्स सारके कोर्स तुमी फुकट करपाक शकतात. खेरीज ते सरकार मान्य. तुमी म्हणटले सरकारी काॅलेज जाल्ल्यान हें जावंक शकता. तुमी www.gccem.sc.in ही बेवसायट पळोवची. कार्यालयाच्या 90285 86776 ह्या नंबराचेर तुमी संपर्क करूं शकतात.
तुमी कुशळटायेचे कोर्स करूं शकतात वा डेटा सायन्स सारको पदवी दिवपी कोर्स. तो भुरग्यांक आवडटलो. तुमी खंयचेय काॅलेजींत प्रवेश घेवपाचें थारायलें जाल्यार तांची वेबसायट पळोवपाक विसरूं नाकात. ते काॅलेजींत कोण शिकल्यात जाल्यार तांचे कडेनूय चर्चा करात. तुमच्या शिक्षकांचो सल्लो घेयात. मागीर किते तो निर्णय घेयात. खरें म्हणल्यार जानेवारी लागलो काय गोंयांतल्या सगल्या काॅलेजींच्यो वेबसायटी पळोवन दवरपाक जाय. तो एकतरेचो अभ्यासूच. गोंय विद्यापीठ हें गोंयांत एकसुरे विद्यापीठ आसलें, मात आतां बेतूल सड्यार दुसरें विद्यापीठ सुरू जाता. विद्यार्थ्यांक ताचोय लाव जातलो.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
