भांगरभूंय | प्रतिनिधी
ते सगळे बोर्ड रद्द करप. आनी अख्या भारता खातीर असलो एकूच बोर्ड जल्मांक हाडप. हो बोर्ड अख्या भारतांतल्या बारावेच्या शिकपी भुरग्या खातीर परीक्षा घडोवन हाडटलो.
नवें शिक्षणीक धोरण- 2
तोमाझिन कार्दोज
9822170102
हें धोरण खरेंच बरें आसा, तातूंत मातूय दुबाव ना. पूण, तें वेव्हारात घालचे आदीं पयलें सगल्या इश्कोलांनी एक सारक्यो सवलती रचपाची ताकतीकेची गरज आसा.
फाटल्या लेखांत केंद्र सरकाराच्या ‘ह्यूमन रिर्सोस डॅवलॉपमॅन्ट मिनिस्ट्रीरी’ हांणी जाहीर केल्ल्या ह्या शिक्षणीक धोरणांत दोन म्हत्वांच्यो येवजणी आसात म्हूण हांवें सांगिल्लें. पयलीं येवजण म्हणल्यार परिक्षा नासतना बारावे वर्ग पर्यान, इंटरर्नल मुल्यमापनाच्या आदारान शिकपी भुरग्यांक उंचेल्या वर्गांत धाडप. हे येवजणे विशीं आमी फाटल्या लेखांत चर्चा केल्या. दुसरी म्हत्वाची येवजण म्हणल्यार भारत देसांतल्या सगळ्या प्रांतांनी धावेचे आनी बारावेचे बोर्ड आसात. जे धावी आनी बारावे वर्गांनी असल्या शिकप्यांची परीक्षा घेतात, ते सगळे बोर्ड रद्द करप. आनी अख्या भारता खातीर असलो एकूच बोर्ड जल्मांक हाडप. हो बोर्ड अख्या भारतांतल्या बारावेच्या शिकपी भुरग्या खातीर परीक्षा घडोवन हाडटलो.
खरेपणी अख्या भारतांत असलो बोर्ड आसप शिक्षणीक मळार खूब बरेंपणाचें आसा. हांव त्या येवजणेंत बरेंपण आसा. इतलेंच कारणाक लागून म्हणटा, भारतांतले सगळे भुरगे एकूच परिक्षा दितले. एकूच तरेच्या प्रस्न पत्रिकेंत जाप दितले. जाप –प्रस्न पत्रिकेची तपासणी एकूच तरेन जातली. आनी अखेरेक जो नियाळ जाहीर जातलो, तो एकूच तरा वापरून केल्लो आसतलो. हाचो अर्थ असो की अख्या भारतांत शिक्षणीक ‘युनिफोर्मिटी’ आसतली. आमच्या प्रातांनी आनी देसांत शिक्षणीक दर्जो कितलो उंच आसा, वा सकयल आसा तो सोंपेपणी कळून येतालो.
दुसरे फायदे
तेच परीं आनीकूय फायदे आसात हांव थोडक्यांत वाचप्यांच्या नदरेक हाडटां.
आतां ते येवजणेंत बारावी पास जाली म्हणून शिकपी भुरग्यांचे कश्ट काबार जायनात. प्रोफेशन कोर्सींक जशे परीं दोतोरकी, इजनेर आदीं हांकां प्रवेस घेतलो जाल्यार तांणी ‘ऑल इंडीया प्रवेश परिक्षा’ दिवची पडटा. म्हणचें हे परिक्षेक हाजीर जावंक आनी तातूंत उंच गूण मेळोवन घेवचे खातीर भुरग्यांच्या मनार आनीक एक फावट दुबाव आनी ताण पडटा. अख्या भारतांत एकूच बोर्ड केल्यार असल्यो ‘एन्टरेन्स परिक्षा’ काबार जातल्यो. आनी भुरग्यांच्या बारावेच्या निकालाचेर आदारूनच भुरग्यांक ‘प्रोफेशनल कॉलेजींनी प्रवेश मेळटलो.
प्रत्येक प्रांतात आप आपलो शिक्षणीक दर्जो खंय पावला तो सोंपेपणी कळून येतलो. हाका लागून प्रत्येक प्रांतांत शिक्षणीक दर्जो वरवीं प्रांतांची शिक्षणीक परिस्थिती उग्तेपणी दोळ्यार मुखार येतली. आपल्या प्रातांचो शिक्षणीक दर्जो उंच आसप, हें त्या – त्या राज्यांचो गर्व जावन आसा. म्हणटकच प्रत्येक प्रांतांत आप आपलो शिक्षणीक दर्जो वयर काडूंक खास प्रयत्न करचे पडटले. तेन्नाच आमच्या देसांत शिक्षणीक फुडार पर्जळटलो.
अडचणी
पूण सगळे बोर्ड रद्द करून एकूच बोर्ड रचपाक आनी अख्या भारतांत बारावेची एकूच परिक्षा घेवपाक शक्य आसा काय? म्हज्या विचारा प्रमाणें ना? हांची कारणां आसात:-
एकूच शिक्षणीक बोर्ड आसप म्हणचें एकूच सिलेबस सगळ्या इश्कोलांनी लागू करप. म्हणचें भारतांतल्या सगल्या इश्कोलांनी ज्यो सवलती आसात त्यो एक सारक्यो आसप गरजेच्यो.
आमच्या देसांत वेग-वेगळ्या लोकांक वेग – वेगळीं इश्कोलां आसात, म्हणल्यार फट जावचें ना. आयज आमच्या भारतांतलो नागरीक आपली दुडवाची तांक पळोवन इश्कोलां वेंचून काडटा. म्हज्या मता प्रमाणें तीन तरांची इश्कोलां आसात –
अ) इश्कोलां जीं दुडवांकार आनी गिरेस्तांची शिक्षणीक गरज करता.
ब) इश्कोलां जीं मदल्या वर्गांच्या (मिडल क्लास ) लोकांची गरज करता. क) इश्कोलां जातूंत फकत गरीब लोक आपल्या भुरग्यांक धाडटात.
अ) इश्कोलांनी सगळ्यो सुविधा सवलतीं आसात,- ब-यातले बरे शिकोवपी, बेसबरी लायब्ररी, त्या परस उत्तम लॅबोरेट्री सगळ्या तरेचीं खेळांमळां, पेंवपाचे पूल आदीं.
ब) इश्कोलांनी वयर सांगिल्ल्यो तश्यो पर्यान सवलतीं आसनात.
क) इश्कोलांनी तर उल्लेख करपा सारक्यो कसल्योच सवलतीं नात त्या खातीर एक सारक्यो सवलती ना जाल्यार एक सारकी परिक्षा कशी दिवं येता? आनी तशी परिक्षा दिली जाल्यार भुरगे ती यशस्वीपणान करूंक शकतले? ना.
आमच्या उत्सकतायेक लागून आमी हे नवें धोरण ताकतीकेन लागू केलें जाल्यार भुरग्यांचेर, अदीक करून गरीब शिकपी भुरग्यांचेर, अनीत जातली. शिक्षणीक मळार आमी ह्या भुरग्यांक सारके निराशी करून सोडटले.
सोंपयतना…
हें धोरण खरेंच बरें आसा. तातूंत मातूय दुबाव ना. पूण तें वेव्हारांत घालचे आदीं. पयलें सगळ्या इश्कोलांनी एक सारक्यो सवलतीं रचपाची ताकतिकेची गरज आसा. हें करपाक आमच्या देसांत (अ), आनी (ब) असल्या भागांनी वांटिल्ल्यो शाळा आसूंक फावना. सगल्याच इश्कोलांनी (अ) कॅटेगरीच्यो सवलती आसपाक जाय. आनी तशें घडपाक सरकारान शाळांनी एकूच तरेची परिस्थिती रचपाक जाय. बरे शिकपी, ब-यो लायब्ररी आनी लॅब्रोरेट्री, सगल्या तरांचीं खेळां मैदानां, पेंवपाचे पूल आदीं. सगल्या इश्कोलांनी आसपाक जाय. तेन्नाच गरीबांतले गरीब शिकपी भुरग्यांक पर्यान एकूच परिक्षेक जाप दिवंक कठीण जावची ना. त्या खातीर गरजेच्यो साधन सुविधा तयार करचे आदीं तें धोरण इश्कोलांनी लागू करप भुरग्यांच्या शिक्षणीक फुडाराक घातकी थारतलें हातूंत दुबाव ना.
(लिप्यांतर : विशाल खांडेपारकार)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
