भांगरभूंय | प्रतिनिधी
आ मच्या हिंदू धर्मांत श्रावण म्हयन्याक खुबूच म्हत्व आसा. श्रावण म्हयनो म्हणल्यार सणां-परबांचो राजा, सगल्या सणांची सुरवात जाता ह्याम्हयन्यांतल्यानूच. पुराय सरभोंवतणी पाचवेचार रंग भरिल्लो दिसता, चारूय वाटेन फुलांचो सुगंधीत वास, देवळांत चालू आसता सगले वार, रांदचेंकुडींत शिवराक जिनसांचो वास पातळटा. नाग, दर्या, पीक आदी सारकिल्ल्या सैमाच्या घटकांची पुजा करुन ताचो उपकार मानतात आनी ह्या सगळ्यांनी मनाचें खोशयेक शीममेर उरना. मन सामकें पवित्र जाता आनी पुराय तरेन भक्तींत- श्रध्देंत रुजता. नागपंचम, रक्षाबंधन, सुतापुनव, गोकुळाश्टम श्रावणाच्या म्हयन्यांत मनयतात. प्रत्येक सणांक आपलीं विशेश खाशेलपणां आसता.
पूण श्रावण म्हयन्यांत आमी आनीक एक परब मनयतात तीं म्हणल्यार नया परब. नया परब घरांत नयें बांदपाची परब म्हणल्यार जाता. नया पंचम (नया परब) श्रावण-भाद्रपद म्हयन्यांत रक्षाबंधन जावन पांच दिसानीं मनयतात. नयें तयार करपाक शेतांतली कणसां, आंब्याची पानां आनी बांबूची बडी हांचो आस्पाव जाता. ह्या तिनूय वस्तूचो आदार घेवन नयें तयारजाता. फाटल्या पन्नास वर्सां सावन चलत आयिल्ली आमची ही परंपरा. गांवांत नया परब व्हडल्या सणां सारकी मनयतात. नया परब आशिल्ल्याा दिसाक फांतोडेर ‘म्हार’ ‘धोल’ वाजयता. सकाळीं सगळीं न्हावन धुंवन तयार जातात. बायलां जेवणाचे तयारेक लागतात आनी गांवांतले सगले दादले गांवांत आशिल्ले ‘श्रीसिद्धेश्वर महादेव प्रसन्न’ देवळां कडेन वतात आनी तेन्ना तांच्या पांयांनी वाणे (जोती) नासता.
मुखेल वेळीप आनी म्हार ‘नयें’ हाडपाक वतात आनी नयें हाडलें उपरांत भट पयलीं नयें महादेव देवाक ओंपतात. महादेव देवाक ओंपले उपरांत मुखेल वेळीप साठ पुरव 60 देवाक उरिल्ले नयें ओंपता. नयें सगल्वया देवाक ओपलें उपरांत वेळीप गांवच्या हेर लोकांक नयें वाट्टा. उपरांत वेळीपा फुडल्यान ‘म्हार’ धोल वाजयता आनी सगले लोक वेळीपा वांगडा एक ओळीन येतात आनी ‘घरवही’ वतात आनी बांबूचे बडयेक आंब्याचे पानां वांगडा नये बांदतात आनी वेळीप ती बांबूची बडी घरवहीच्या मुखेल दाराक बांदता. देवळा कडेन सगल्यांक नयें बांदूंन जातना सगले लोक आपल्या घरांक बांदपाक नयें घेवन घरां येतात आनी घराच्या मुखेल दारांत नयें बांदतात आनी धान ‘घरपुरश्याक’ लेगीत नयें बांदतात आनी मागीर कांय नयें पुरसाक, तांदळाचे मडकेक, चुलीक, गाडयेक बांदतात.
नया परबेक घरा कणकणीं बायलां तरेकवार जेवण रांदतात आनी जेवणा वांगडा गोडश्याचो स्वादूय आसता. नयाची परब मनोवपा फाटलें मुखेल कारण म्हणल्यार शेतांत नवें पिकावळ येता आनी गांवचे लोक अशें मानतात की देवाक नवें पिकावळ ओंपले उपरांत देवाच्या आशिर्वादान शेतांत बरी पिकावळ जाता. अशें तरेन आमचीं नया परब आमी पुराय तरेन खोशयेन मनयतात.
(टीप: लेखांत जातींचो उल्लेख जाला कारण त्या जातीचें नांव नासतना लेख बरोवपाक कठीण जातालें. खंय चुकल्यार
समजून घेवचें.)
श्वेता गांवकार
7767952911
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
