बायो- घडयाळ

भांगरभूंय | प्रतिनिधी

जर आमकां दुसरे दिसा सकाळीं बेगीन कसल्याय कामां खातीर प्रवास करचो आसता तेन्ना आमी आदले रातीं सकाळीं 4 वरांचो मोबायलार गजर सेट करून न्हिदतात. पूण जायते फावटीं आमी थारायिल्ल्या वेळार गजर सेट करिनासतना लेगीत जागे जातात. हाका बायो- क्लॉक म्हणटात. आर्विलो काळ सोडल्यार पुर्विल्ल्या काळा सावन मनीस सरासरी 80-90 वर्सां पिराये मेरेन जिवीत जगता अशें जायत्या जाणांचें मत. तशेंच 50-60 वर्सां उपरांत कुडीक दुयेंसांक लागून भलायकी इबाडपाक सुरवात जाता असोय तांचो खर विस्वास आसा. ही मानसीकताय मनशा भितर इतली खोलायेन रुजल्या की ते आपलें स्वताचें बायो घडयाळ थारला. देखून जायत्या जाणांक पिरायेच्या 50-60 वर्सां उपरांत भलायकेच्यो कागाळी सतावपाक लागतात.
खरें म्हणल्यार आमीच मानसीक रितीन आमच्या बायो- घडयाळीचें चुकीचें प्रोग्रामींग केल्लें आसता. चीनी देशांतल्या लोकांची हे विशीं पळोवपाची नदर वेगळी आसा. चीनांत आपूण 120 वर्सां मेरेन भलायकेन भरिल्लें जिवीत जगूंक शकतलों अशे पुराय आत्मविस्वास आनी सकारात्मक मानसीकतेन तांणी तांचें बायो- क्लॉक तशें सेट केल्लें आसता आनी तेच प्रमाण तुमचेंय बायो-क्लॉक रिसेट करचें आनी लांब जिवीत जगचें अशें म्हाका सांगीन दिसता.
कांय म्हयन्यां आदीं हांवें एका इंग्लीश म्हयन्याळ्यांत मानसीक भलायकी सुदारपा विशीं एक लेख वाचिल्लो. ताचेर खोलायेन विचार केलो. लेखक मानसीक भलायकी तज्ञ आशिल्ल्यान ताणें 100 वर्सां बरे भलायकेचें जिवीत जगपा विशीं कांय मुद्दे मांडल्यात.

1. मानसीक रितीन बायो-क्लॉक पॉझिटिव्ह सेट करप. नेमान ध्यान केल्यार आमी उण्यांत उणीं शंबर वर्सां भलायकेन जियेवंक शकतात अशें मनांत निश्चित करचें.
2. 40 ते 90 वर्सां पिरायेच्या अंतरांत कसलोच रोग जायना. ना 120 वर्सां उपरांतच रोग लागपाक सुरू जाता हें मान्य करचें .
3. केंस धवे जाले तरी सैमीक रितीन रंगोवचे, सदांच तरणाटे दिसपाचो यत्न करचो. तरणाट्या सारको भेस करचो. हाका लागून तुमचो आत्मविस्वास वाडटलो. खंयचेय परिस्थितींत स्वताक जाण्टो समजूं नाकात.
4. जेवतना नकारात्मक विचार करचो न्हय. देखीक हें जेवण भेसळ, हानीकारक अशें समजून घेवप टाळचें. ताचे बदला ध्यानाच्या बळग्यान घेतिल्लें जेवण म्हजे कुडीचें शुध्दीकरण करपी अमृता समान असो खर विस्वास दवरचो. जेवण म्हाका 120 वर्सां मेरेन निरोगी आनी लांब आयुश्य दितलें अशें मान्य करात कारण नकारात्मक विचार कुडींत हानीकारक एंझायम तयार करतात. जें पचन आनी भलायकेक हानीकारक आसता.
5. सदांच सक्रीय रावचें. चलपाचो व्यायाम करचे बदला शक्य जाल्यार जॉगिंग करपाचो यत्न करचो.
6. पिराये प्रमाण भलायकी बरी जाता अशें मानप. (हें शास्त्रीय नदरेन खरें!)
7. सूख आनी दुयेंस एकठांय येवंक शकनात. जंय सूख आसा थंय दुयेंस अस्तित्वांत आसूंक शकना. खुशाल रावप, निरोगी रावप हाचेर भर दियात.
8. हांव केन्नाच जाण्टो जालां अशें केन्नाच फकांडांनी लेगीत म्हणूं नाकात! तुमच्या विचारांक आनी उतरांनी तुमच्या जिविताक आकार मेळटा. बायो-क्लॉक रिसेट करात आनी दीर्घायुश्य अणभवात! वृत्ती बदलून जिवीत बदलून जिणेंतलो आनंद घेवचो.
9. सुदिन वि. कुर्डीकार.
10. 8275425404