भांगरभूंय | प्रतिनिधी
पणजी : पाटो पुला लागसारच्या एका क्लबांत सोर्याचे धुंदींत बोवाळ करून बायल सुरक्षा रक्षकाची फकांडां केल्ल्या प्रकरणांत दोगां पुलिसांक निलंबीत केल्यात. हें प्रकरण २३ जुलयाक रातचें घडलें. संबंदीत बायलां सुरक्षा रक्षकान हे विशीं कागाळ नोंद केले उपरांत, दुसरेच दिसा पणजी पुलीस स्टेशनांत गुन्यांव दाखल केलो.
हे विशींचे कागाळी प्रमाण, दोगां पुलीस कर्मचार्यांनी पिडेस्ताचो विनयभंग केलो आनी अपमान करपा सारकी तिका वागणूक दिली. इतलेंच न्हय तर तांणी पिडेस्ताचे तकलेर मोबायल फोनान हल्लोय केलो. ह्या हल्ल्यान तिका दुखपत जाली. बायलां सुरक्षा रक्षकाचे कागाळीच्या आदाराचेर त्या दोगांयचेर भारतीय न्याय संहितेच्या कलम ७४, ७९, ११८, ३५२सयत कलम ३(५) खाला दोगां आड गुन्यांव नोंद केला.
उत्तर गोंय अधीक्षक कार्यालयांत कार्यरत आशिल्ल्या ह्या दोगूय पुलीस कर्मचार्यांक तेन्नाच निलंबीत केले. तांचे वांगडा आशिल्ल्या तिसर्या पुलीस कर्मचार्याकूय कारणां दाखयात नोटीस दिल्या. बायलां पुलीस उपनिरीक्षक सपना गांवस हांच्या मार्गदर्शनाखाला फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
