भांगरभूंय | प्रतिनिधी
आ मच्या देशांतल्या दादल्यांच्या वर्चस्वा खालचे कुटुंब
वेवस्थेक लागून बायलांक सदांच दुय्यम दर्जो मेळ्ळा.
‘चुल आनी मूल’ हांकां बायलांचो संवसार मानतात. चलयांक जल्माक येवचे पयलींच गर्भांत मारून उडयतात. बायलेक हुंबरो हुपल्यार आदल्या काळार व्हड पाप मानताले. आयजूय दुबाव घेवपी दादले आसात. ताकाच लागून बायलांक आपले हक्क सोडून दिवचे पडले, दादल्यांचे बरोबरीन तांकां हक्क नाशिल्ले. महात्मा ज्योतिराव फुले हांणी चलयां खातीर शाळा सुरू करून बायलांक हक्क मेळोवपा बाबतींत पयलें पावल उखल्लें, तरीय बायलांक हक्क मेळपाक आनी मनीस म्हणून जगपाक देड शेंकड्या परस चड वेळ लागलो.
मजगतीं, बायलांच्या सशक्तीकरणा खातीर जायतीं कामां जालीं. देशाच्या स्वातंत्र्या उपरांत बायलांच्या सशक्तीकरणा खातीर वेळोवेळ जायते उपक्रम चालीक लागले. शिक्षणीक, राजकी मळार बायलांक आरक्षण मेळ्ळें. हाचो फायदो घेवन बायलांनी सगळ्या मळाचेर पावल दवरलें. अशे वाठार नात जंय बायलां फुडारी नात, देखूनच भारत एक नेटान विकसीत जावपी देश म्हणून मुखार आयला. देशांतल्या लोकांक ताचो अभिमान आसा; पूण संवसारीक पांवड्यार जेन्ना बायलांचें सशक्तीकरण सुरू जाता तेन्ना फकत निर्शेवणी करपी चित्र दिसता. बायलां सशक्तीकरणाच्या प्रस्नाचेर आमचो देश 146 देशांनी 136 वा 137 वे सुवातेर आयला, पूण स्वातंत्र्या उपरांत 75 वर्सां उपरांत लेगीत आमच्या देशांत बायलांक सर्वार्थान सशक्त करपाक मेळ्ळें ना, तें कित्याक हो प्रस्न उप्रासता.
आयज आमच्या देशाचो अमृत महोत्सव मनयतना सगल्याच बायलांक अजूनय आपल्या पांयांचेर उबे रावपाक मेळना, स्वताच्या पांयांचेर उबी रावपी बायलेचो स्वताचे मिळकतीचेर हक्क ना. ज्या देशांनी बायलांक प्रधानमंत्री, राष्ट्रपती सारकिल्लीं उंचेलीं पदां आसात, त्या देशांत बायलां अजूनय सक्षम जायनात जाल्यार तें एक घटमूट समाजाचें लक्षण न्हय. फकत बायलांक सशक्तीकरणाच्यो गजाली मारून बायलां सक्षम जावचीं नात. तांकां सक्षम करपाक जाय जाल्यार तांचे हक्कतांकां मेळपाक जाय. दादले आनी बायलां मदीं भेदभाव करिनासतना बायलांक सशक्त करपा खातीर एकवटीत यत्न करचे पडटले.
देशाच्या स्वातंत्र्या उपरांत डॉ. बाबासाहेब आंबेडकर हांणी जेन्ना संविधान बरयलें तेन्ना तांणी समानते विशीं कसलीच तडजोड केली ना. संविधानान दादल्यां भशेन बायलांक सगळे हक्क दिल्ले आसात. दरेकल्याक समान हक्क मेळपाक जाय, असो स्पश्ट उल्लेख आमच्या संविधानांत आसा. बाबासायबान संविधान बरयतना सांगिल्लें की आमकां समानतेच्या आदाराचेर समाज उबारपाचो आसा, देखून ताणें सरकार वेंचून काडपाक बायलांक दादल्यां भशेन मतदानाचो अधिकार दिलो. बायलांक दादल्यां भशेन सगळे हक्क मेळ्ळ्यात, पूण ते चालीक लावप ही सरकाराची जापसालदारकी. सरकाराक आपली जापसालदारकी पाळपाक अपेस आयलां, देखूनच बायलां सशक्तीकरणाचे बाबतींत अजून भारत हेर देशांचे तुळेन सकयल आसा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
