भांगरभूंय | प्रतिनिधी
बंगळुरूंत एके कंपनींत अभियंतो आशिल्ल्या 34 वर्सा पिरायेच्या अतुल सुभाष ह्या तरणाट्यान घरकान्नीच्या त्रासाक बेजारून आत्महत्या केली. आत्महत्या करचे पयलीं ह्या तरणाट्यान आपले वेली आपबिती 90 मिणटांचो व्हिडियो काडून तशेंच 40 पानांचो सुसायड नोट बरोवन सांगली. ह्या तरणाट्याक ताची घरकान्न आनी मावोडेच्या लोकांनी हुंडाबळीच्या चुकीच्या आरोपा खाला बंदखणींत धाडिल्लो. कांयच चूक नासतना ह्या तरणाट्याक बंदखणींत वच्चें पडलें. न्यायालयांत तो स्वता निर्दोश आशिल्ल्याचें सिद्ध करूंक शकलो ना. समाजांत ताची बदनामी जाली आनी ताका लागून आयिल्ले निरशेवणेंतल्यान ताणें आत्महत्या केली. अर्थांत अशी आत्महत्या करपी अतुल सुभाष हो पयलोच तरणाटो न्हय. हाचे पयलींय खूबशा तरणाट्यांनी घरकान्नीच्या त्रासाक बेजारून आत्महत्या केल्या. ज्या तरणाट्यां मदीं आत्महत्या करपाचें धाडस आसना ते तरणाटे घरकान्नीचो त्रास ओग्गी रावन सोंसून घेतात वा घर सोडून आश्रमांत वतात.
महाराष्ट्रांतल्या औरंगाबादांतल्या वाळूंज वाठारांत असोच घरकान्नीच्या त्रासाक लागून बेजारिल्ल्या दादल्यां खातीर आश्रम आसा. ह्या आश्रमांत कांय घरकान्नीन त्रास दिल्ले पिडीत दादले रावतात. हे पिडीत दादले वटपौर्णिमेच्या आदल्या दिसा पिंपळाची पुजा करून पिंपळ पौर्णिमा मनयतात. हे दादले दरवर्सा पिंपळ पौर्णिमा मनयतात. आमच्या बायलांनी आमकां इतलो त्रास दिला की आमी तांचे बरोबर सात जल्मूच न्हय सात सेकंद लेगीत संवसार करूंक शकनात म्हणूनच आमकां अशे तरेचीं बायलां दिवचे परस कायमचो मुंजा दवर अशी प्रार्थना ते यम आनी मुंजेक करतात. हो प्रकार मात्सो विचित्र दिसता आसलो तरी खरो आसा.
कुंटुंबीक हिंसाचारांत बायलांचेरूच अन्याय अत्याचार जाता. बायलांच हिंसेची बळी थारतात अशें आमकां खबर आसा. पूण दादले लेगीत कुटुंबीक हिंसाचाराचे बळी थारतात हाचेर अजून लेगीत खूबशा जाणांचो विस्वास बसना. हाका कारण आमची दादले प्रधान संस्कृती. दादलेच बायलांचेर अत्याचार करतात, तांचो मानसीक छळ करतात हेंच आयज मेरेन आमी पळयत आयल्यात. पूण आतां काळ बदल्ला. दादलेय बायलांच्या अतचाराक बळी पडत आसात. आयज कितलेशेच दादले बायलांचो मानसीक अत्याचार सहन करतात. बायल आपल्याचेर अत्याचार करता, आपलो मानसीक छळ करता हें जर समाजाक कळत जाल्यार आपल्याक लज जातली हे भिरांतेन खूबशे दादले तो अत्याचार ओग्गी रावन सोंसून घेतात. जांकां हो अत्याचार सहन जायना ते अतुल सुभाष सारके तरणाटे आत्महत्येचो मार्ग आपणायतात.
कायदोय बायलांचेच वटेन आसा. बायलेचो घरकार वा ताच्या कुटुंबा कडल्यान जावपी छळ आडावपा खातीर 498 (अ) हो कायदो केला. बायलांक संरक्षण दिवपा खातीर तयार केल्ल्या ह्या कायद्याचो हालींच्या दिसांनी व्हड प्रमाणांत दुरुपेग जावंक लागला. ह्या माध्यमांतल्यान घोव आनी ताच्या घरच्या लोकां आड वैयक्तीक सूड काडटात. बायलांनी तांच्या संरक्षणा खातीर केल्ल्या कायद्याचो अशे तरेन दुरुपेग करचो न्हय अशी टिप्पणी सर्वोच्च न्यायालयान लेगीत केल्या. तरी लेगीत ह्या कायद्याचो दुरुपेग उणो जायना. बायलेन घोवा आड कागाळ दीत जाल्यार ताची रोखडीच दखल घेतात. बायलेचेर अन्याय करपी घोवाक रोखडीच अटक जाता, पूण घोवाक बायले आड कारवाय करपाची आसत जाल्यार आमच्या देशांत कुटुंबीक हिंसाचार अधिनियमना सारको कायदो उपलब्ध ना. सद्या आशिल्ल्या कुटुंबीक अधिनियमन संरक्षण कायदो दादल्यांक राखण दिना. विकसीत देशां मदल्या लींग निरपेक्ष कायदे दादल्यांक बायलां भशेनूच संरक्षण दितातूच, तशेंच दादले पिडीत आसूंक शकतात ह्या वास्तवाचो स्विकारूय करतात. ताका लागून थंय ह्या विशयाचेर संशोधनूय जायत आसता.
आमच्या देशांत दादले लेगीत बायलांच्या अत्याचारान पिडीत आसतात हें वास्तव अजून लेगीत स्विकारनात. दादले कुटुंबीक हिंसाचाराचे बळी थारूच शकनात अशी धारणा अासपी लोक सामान्यतायेन असो तर्क दितात. दादले हे बायलां परस घटमूट आसतात. अशे स्थितींत बायलां दादल्यांचेर आघात कश्यो कितें करूंक शकतात? पूण एका संशोधनांत अशें सिद्ध जालां की हिंसक संबंदां मदीं बायलां लेगीत दादल्यां इतल्योच आक्रमक जावंक शकतात. तशेंच मानसीक छळ करपी बायलांचो हात कोणूच धरूंक शकनात. चड करून जे संवेदनशील मनाचे दादले आसतात ते अशा हिंसाचाराक बळी पडटात. ताका लागून बायलां प्रमाणूच पिडीत दादल्यांकूय संरक्षणाचो अधिकार मेळचो हे खातीर सरकारान कुटुंबीक हिंसाचार अधिनियम कायद्यांत दुरुस्ती करून बायल पिडीत दादल्याक संरक्षण दिवचें.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
