भांगरभूंय | प्रतिनिधी
कोरगांव ग्रामसभेंत थारावः साबार विशयांचेर चर्चा
भांगरभूंय । प्रतिनिधी
कोरगांवः पंचायत मंडळाच्यो बसका जातात तेन्ना तातूंत महिला पंच वांगड्यांच्या घरकारांक घरकान्नी वतीन उलोवपाक दिवचें न्हय. तेचवरी तांकां बसकांक हाजीर रावपाक दिवचें न्हय, असो थाराव कोरगांवचे ग्रामसभेंत विनिता मांद्रेंकार हांणी मांडलो. ताका ज्योती शेटगांवकार हांणी अनुमोदन दिलें. हाचेर जाप दितना नरेश कोरगांवकार हांणी सांगलें, अशा बसकांक महिला पंचाच्या घरकाराक उलोवपाची मेकळीक ना, पूण तो बसकेक हाजीर रावपाक शकता. ह्या मुद्द्याचेर अभ्यास करून योग्य निर्णय घेतले, अशें सरपंच सामील भाटलेकार हांणी सांगलें.
कोरगांव पंचायतीची ग्रामसभा सरपंच सामील भाटलेंकार हांचे अध्यक्षते खाला जाली. तातूंत साबार विशयांचेर चर्चा करून थाराव संमत केले. ह्या वेळार माचयेर उपसरपंच कल्पेश काळसेकार, पंच अब्दुल करीम, यासीन नायक, अनुराधा कोरगांवकार, देविदास नागवेंकार, दिवाकर जाधव, नीता नितीन नर्से, लौकीक शेट्ये, उमेश च्यारी, पंचायत सचीव श्रद्धा कोरगांवकार हाजीर आशिल्ले.
पंचायतीन बँकांक वेवसायीक कर लावचो, दुकान, हॉटेल, बार सुरू करप्यां कडल्यान वेवसायीक कर घेवचो, असे थाराव सुदीप कोरगांवकार हांणी मांडले. केंद्रा कडल्यान मेळिल्लो निधीचो वापर पंचायत सभाघराक तेर्रास घालपा खातीर वापरचो, अशें सर्हेश थळी हांणी सुचयलें.
कोरगांवां उदका पुरवणेची खर समस्या आसा. एकाय आमदारान ही समस्या गांभिर्यान सोडोवंक ना. ताका लागून आमदाराचेर पातयेवन रावानासतना पंचायतीन उदका खातीर वेवस्था करची, अशें दशरथ गावडे हांणी सुचयलें. खंडीत वीज पुरवण जाग्यार घालचे खातीर भुंयगत केबल घालचे, असोय थाराव तांणी मांडलो. तशेंच कोरगांव पंचायती खातीर कायमस्वरुपी तलाठी नेमपाची मागणी केली.
गणपती पावयतात त्या रस्त्याचेर लायट घालचे खातीर हाडिल्लें सामान खंय आसा, ताचो सोद घेवन तें पंचायतीन ताब्यांत घेवचें, अशी मागणी सुदीप कोरगांवकार हांणी केली. फाटल्या पंचायत मंडळान घरपटी घेतात त्या नोंदणी पुस्तकांत एकाच घराचीं पांच ते स प्रतिज्ञापत्रां घेवन एकूच घर नंबर दिला. ताची चवकशी करची, अशी मागणी सुदीप कोरगांवकार आनी नरेश कोरगांवकार हांणी केली. ताचेर सरपंच भाटलेंकार हांणी चवकशी करून निर्णय घेतां, अशें उतर दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
