भांगरभूंय | प्रतिनिधी
भांगरभूंय । प्रतिनिधी
पणजीः बायल आनी भुरगी कल्याण मंत्रालयाच्या चार केंद्रीय येवजणेतल्यांन फाटल्या तीन वर्सात राज्यांक सुमार 28 कोटी निधी आयलां. तातुंतल्या दोन येवजणे खातीर अंदूंचे वर्सा शुन्य निधी केंद्रा कडल्यान आयलां. ते भायर केंद्रीय मंत्रालयाचो अतिरीक्त दोन येवजण्यो आसात तातुंतल्यान राज्यांक अजून मेरेन कसलोच लाव मेळूंक ना, अशी म्हायती केंद्रीय बायल आनी भुरगीं उदरगत मंत्रालयान दिली.
लोकसभेच्या पटलार लेखी जाप दितना केंद्रीय बायल आनी भुरगीं उदरगत मंत्री सावित्री ठाकूर हिणें सांगलें, मंत्रालय आंगणवाडी सेवा येवजण, संकल्प: एचईव्ही बायल सशक्तीकरण येवजण, पाळणा येवजण, प्रधानमंत्री मातृ वंदना येवजण, शक्ती सदन येवजण आनी सखी निवास येवजण चालीक लायता.
आंगणवाडी सेवा खाला मिशन सक्षम आंगणवाडी आनी पोशण 2.0 ह्यो दोन येवजण्यो चालीक लायता. 15वे अर्थाक आयोगा खाला ह्या येवजणे सकयले वेगवेगळे घटक जशें 6 म्हयने ते 6 वर्सा मेरेनच्या भुरग्यांक, बाळंत आनी गुरवार बायलां तशेंच किशोर पिरायेच्या चलयांक पोश्टीक अन्न दितात. तशेच 3 ते 6 वर्सा पिरायेच्या भुरग्यांक जतनाय आनी शिक्षण सेवा आनी आंगणवाडीचे साधन सुविधा सुदारपाचे काम हे येवजणे खाला जाता. हे येवजणे खातीर फाटल्या तीन वर्सात केंद्राकडल्यान 25.89 कोटी आयिल्लें. वर्स 2023-24त 13.94 कोटी आनी 2024-25त 11.95 कोटी आयिल्लें.
विविध मळार बायलांचे क्षमते भितर जो उणाव आसा तो भरून काडून तांका सशक्त करपा खातीर संक्लपः एचईव्ही ही बायला सशक्तीकरण येवजण केंद्र सरकार चालिक लायता. हे येवजणे खातीर 30.37 लाख केंद्रा कडल्यान राज्यांक आयलां. हो निधी फकत वर्स 2023-24त आयिल्लो. वर्स 2024-25 खातीर एकूय दूडू केंद्रा कडल्यान येवंक ना.
जाल्यार पाळणा येवजणे खाला भुरग्यांक जतनाय दिवपाची सुविधा आनी संरक्षण दितात. आंगणनवाडी केंद्राक पाळणाघर म्हूण स्थापन केल्यात आनी आंगणवाडीत भुरग्यांक फावो ती कुयदाद आनी मजत मेळटा. 6 म्हयने ते 6 वर्सा पिरायेच्या भुरग्यांक सुरक्षित वातावरणात दर्जेदार पाळणाघर सुविधा मेळची हो पाळणा येवजेणेचो हेत आसा. हे येवजणे खाला राज्यांक 8.81 कोटी इतलो निधी केंद्रातल्यांन आयलां. हो निधी फकत वर्स 2023-24त आयिल्लो. पूण अंदूंचे 2024-25 वर्सात शून्य निधी गोंया खातीर आयलां.
प्रधानमंत्री मातृ वंदना येवजणे खाला पयले बाळंट जाल्ले बायलेक तांचे खात्यांत 5 हजार इतले अर्थीक सहाय्य लावार्थ्यांक मेळटा. तशेंच दुसरे बाळंट पणाक चली जल्माक आयल्यार पात्र लावार्थ्यांक 6 हजार मेरेन लाव मेळटा. हे येवजणे खाला राज्यांक 1.86 कोटी निधी आयलां.
संकश्टात सापडिल्ले बायले खातीर खास करून तस्करी केल्ले बायलेक थाकाय दिवन तिचे पुनर्वसन करून आलाशिरो दिवपा खातीर शक्ती सदन येवजण चालिक लायता. तशेंच सखी निवास येवजणे खाला काम करपी बायलां खातीर बायलां हॉस्टेल बांदपाची येवजण आसा. पूण हे येवजणेची अंमलबजावणी राज्यांन करूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
