भांगरभूंय | प्रतिनिधी
हय, बायलो लेगीत वेवसाय करपाक शकतात. हें देशांतलें चित्र न्हय, तर आमच्या गोंयांतलें. फातोड्ड्यां तुमी जर डाॅन बाॅस्को काॅलेजींत पावल्यात तर थंय तुमकां कांय वर्सां पयलीं सायना साळगांवकार हें थंय शिकतना दिसलां आसतलें. पूण हें उसगांवचें भुरगें मागीर मडगांवां स्थायीक जालें. ताणें एक व्हड धाडसी निर्णय घेतलो, तो म्हणल्यार सुरक्षीत नोकरी सोडली आनी ताणें एक वेवसाय सुरू केलो. नोकरी सोडप हो धाडसी
निर्णय अशें हांवें म्हणलां, कारण आयज नोकरी, तातूंत सरकारी नोकरे खातीर कितलेय पयशे खर्च करपाक तयार आसतात.
कारण नोकरी म्हणल्यार सुरक्षेची हमी. नोकरी करप म्हणल्यार कोणाचो तरी नंदीबैल जावप हें जरी खरें आसलें तरी तुमकां थंय तुमची तकली चड वापरची पडटाच अशें ना. सायनान बऱ्या पगाराचे नोकरेचेर खोंट मारली. तें आटीएन जालें. साबार दिसाळ्यांनी ताो भोवमान केला. ताका आटीएन राणी हो किताबूय दिला.
तें सांगता, तुमकां जर वेवसाय सुरू करपाक जाय जाल्यार पयलीं स्वताच्या आंगांत धाडस आसपाक जाय. निरक्षीण करून, अणभव घेवनूय तुमी कसलोय वेवसाय करपाक शकतात. कोणाचें मार्गदर्शनूय घेवपाक शकतात. मात एकदां थारायलें काय फाटीं सरूं नाकात. तुमकां फाटी ओडपाक सरभोंवतणी रांक लागिल्ली आसतली. तांका जापो दित बसूं नाकात. तशें केल्यार तुमची शक्त थंय सोंपतली आनी तुमी वेवसाय कराक पावचीं नात. धाडस, निरीक्षण केलें काय भांडवलाची तयारी करात. सगलें भांडवल रीण काडून घेवं नाकात. नाजाल्यार तुमचेर रिणकार जावपाची पाळी येवं येता.
जर तुमी घरांतलोच वेवसाय वाडोवपाक सोदतात जाल्यार ताका नवें रुप दिवपाचो यत्न करात. मार्गदर्शन घेवपाक विसरूं नाकात. मागीर मेल धाडप आनी तंत्रज्ञाना कडेन संबंदीत गजाली शिकून घेयात. तुमकां सुरवातीक हाचो त्रास जावं येता. तुमच्या मळाचेर नवें कितें चल्लां, ताची म्हायती तुमकां आसपाक जाय. बाजाराचोय अभ्यास जाय. तुमी जो वेवसाय करपाक सोदतात जाल्यार ताची म्हायती आनी बाजारान आनीक कोणें हो वेवसाय सुरू केला जाल्यार तो पळयात. देखीक आमच्या दुकानदारांक दनपरां निजपाची संवय. ते दुकान बंद दवरतात. नेमकी हीच गजाल दुसऱ्यांनी पळयली आनी तांणी दनपरां पसून आपलीं दुकानां सुरू दवरून गिरायक आपले वटेन ओडून घेतलें.
घरा मेरेन सेवा दिवची पडटा जाल्यार ताचीय तयारी दवरात. जर तुमकां स्टार्ट अप सुरू करपाचो अशें दिसता जाल्यार तुमी तुमची कल्पना घेवन फातोड्डेंच्या डाॅन बाॅस्को काॅलेजींत येवन हांगाच्या अधिकाऱ्यांक ती सांगपाक शकतात. जर तांकां ती पसंत पडली जाल्यार फुडें कितें करप, पयसो कसो एकठांय करप, हाचें तें मार्गदर्शन तें करतात. रोबोटिक्स आनी कोडिंग हे विशय आतां धावी यत्ते मेरेन शिकयतात. सुनायान ह्या विशयांचेर भर दिला. आमच्या गोवा मंडळान तर हे विशय सुरू करून देशांत पयलो क्रमांक मेळयला. सुनाया म्हणटा, जेन्नां हांवें म्हजी कल्पना म्हज्या वांगड्यांक सांगली तेन्ना तांणी ती उखलून धरली आनी ती चालीक लावपाक म्हाका नोकरी सोडची पडली. म्हजो पापा म्हज्या निर्णयाचेर खूश जालो. तो म्हाका खूबदां प्रोत्साहन दिवपाच्यो गजाली सांगतालो. आतां तो जरी नासलो तरी ताचे संस्कार, आशीर्वाद निश्चितूच म्हज्या फाटल्यान आसात. म्हजी धाकली भयण रिया हें वकील. कायदेशीर मार्ग तेंच
म्हाका सांगता. वेवसाय करतना तुमकां हेरांक नोकरी दिवपाचें समाधान मेळटा, तें नोकरी करतना मेळना. हाचो अणभव हांवें घेतला. आयज म्हज्या पणजेच्या केंद्रांत भुरगे मजा करीत शिकतात, तें पळोवन बरें दिसता.
तुमी वेवसाय सुरू करपाक पळयतात, जाल्यार सुनायाच्या केंद्राक
(https://asiersolutions.in/) जरुर भेट दियात. ताचो मेल आसा, asiercreativity@gmail .com तशेंच तुमकां जर नवी कल्पना सुचत तर डॉन बॉस्को कॉलेज फायर विभाग विसरूं नाकात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
