भांगरभूंय | प्रतिनिधी
जयपूर, खबरां संस्था : राजस्थानांत एका घोवान बायलेचें अपहरण जाल्ल्याची केस दाखल केली. पूण ही केस कोर्टांत पावली तेन्ना बायलेन आपल्याचें अपहरण जावंक ना, अशें सांगलें. म्हणल्यार, तिच्या घोवान ज्या मनशा आड केस नोंद केल्या ती व्यक्ती ताचे कडेन स्वेच्छेनूच लिव्ह-इन रिलेशनशिपांत रावता. हो कायदेशीर गुन्यांव न्हय अशें उच्च न्यायालयान सांगलें.
उच्च न्यायालयान म्हणलां, जेन्ना दोगां प्रौढांचे लग्ना भायर आनीक संमतीन संबंद आसल्यार, तो कायद्यान गुन्यांव न्हय. राजस्थान उच्च न्यायालयान घोवान दाखल केल्ली याचिका भायर मारतना सांगलें, व्यभिचार हो आयपीसीच्या कलम ४९७ खाला अपवाद आसा, जो पयलींच रद्द केला. आयपीसी कलम ४९४ (बिगामी) खाला खटलो तयार करिना, कारण दोगांय मदल्या कोणेंच जोडीदार आसून दुसरें लग्न जावंक ना. जो मेरेन लग्न सिद्ध जायना तो मेरेन लिव्ह-इन रिलेशनशिप सारकिल्लें नातें कलम ४९४ खाला येना.
खरें म्हणल्यार अर्जदारान आपले बायलेचें अपहरण एका मनशान केल्ल्याचो आरोप करून केस दाखल केली. उपरांत ताची बायल प्रतिज्ञापत्र घेवन न्यायालयांत हजर जाली. थंय तिणें सांगलें की कोणेंच तिचें अपहरण करूंक ना, पूण ती आरोपी संजीव हांचे कडेन स्वताच्या इत्से प्रमाण लिव्ह इन रिलेशनशिपांत रावताली. आयपीसीच्या कलम ३६६ खाला कसलोच गुन्यांव जावंक ना आनी एफआयआर रद्द केल्या अशें न्यायालयान म्हणलें.
सुनावणे मजगतीं याचिकाकर्त्याच्या वकिलान युक्तिवाद केलो, बायलेन कबूल केलें तिचे संजीव हांचे वांगडा संबंध आशिल्ले. ताका लागून तो आयपीसीच्या कलम ४९४ आनी ४९७ खाला गुन्यांव थारता. समाजीक नैतिकतेची राखण करपा खातीर न्यायालयाच्या अधिकार मळाचो वापर करपाचो उलो वकिलान मारलो. सर्वोच्च न्यायालयाच्या आदेशाचो दाखलो दिवन एकल खंडपीठान म्हणलें, आमच्या समाजांत मुखेल प्रवाहांत शरिरीक संबंध फकत लग्न जाल्ल्या जोडप्यां मदींच आसचे हें खरें. मात जेन्ना दोन प्रौढ व्यक्ती एकमेकांचे संमतीन विवाहबाह्य संबंध दवरतात जाल्यार तो गुन्यांव न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
