भांगरभूंय | प्रतिनिधी
दिवचले खवदळः नोकरी दिवपाचें हांयस दाखोवन केली फटवणूक
भांगरभूंय । प्रतिनिधी
दिवचलः रेल्वे खात्यांत तशेंच हेर कडेन नोकरी दिवपाचें हांयस दाकोवन दिवचलेच्या तशेंच विवीध वाठारांतल्या खूबश्या जाणांक लाखांनी रुपयांक तोपी घालपी बायले आड दिवचल पुलीस स्टेशनार कागाळ नोंद केल्या. ती बायल दिवचलेच्यान गायब जाल्ल्यान खवदळ पडला. ह्या प्रकरणांत एका पुलीस कॉन्स्टेबलाचोय आस्पाव आशिल्ल्याचें कागाळेंत नमूद केलां. ह्या प्रकरणांत खूबश्या जाणांचे लाखांनी रुपया बुडिल्ल्याची भिरांत उक्तायतात.
ह्या प्रकरणांत कांय दिसां आदीं दिवचल पुलीस स्टेशनांत कागाळ दाखल केल्ली. बुधवारा खूबश्या जाणांनी पुलीस स्टेशनार ती बायल आनी पुलीस कॉन्स्टेबला आड वेगवेगळ्यो कागाळी दाखल केल्यात.
मजगतीं, हें प्रकरण गंभीर आसा. थळावे आमदार डॉ. चंद्रकांत शेट्ये हांकां ह्या प्रकाराची म्हायती मेळटाच तांणी बुधवारा पुलीस स्टेशनार वचून ताकतिकेन हे विशींचो गुन्यांव दाखल करून खर कारवाय करपाची मागणी केली.
आमदार डॉ. शेट्ये हांणी उत्तर गोंय पुलीस अधिक्षका कडेन फोना वयल्यान संपर्क करून ह्या प्रकरणांत दोशी आशिल्ल्यांक बेगिनात बेगीन अटक करून कारवाय करपाची मागणी केली.
ह्या प्रकरणांत 16 ऑगस्टाक दिवचल पुलीस स्टेशनार कागाळ दाखल केल्ली. ते कागाळेंत म्हणिल्ले प्रमाण, ती बायल दिवचले एका अपार्टमेंटांत बिराडाक रावता. 2023 त ते बायलेन आपल्या कोल्हापूरची जमीन रेल्वे रुळा खातीर वतली, ताका लागून तांकां पांच नोकऱ्यो मेळटल्यो अशें पांच जाणांक सांगलें. तुमकां त्यो नोकऱ्यो आपूण दिवपाक शकता, आनी दरेका पोस्टा खातीर 10 लाखांची मागणी केली. ते प्रमाण जुलय 2-23 त तिका 10 लाख रुपया दिले, तशेंच कर्नाटक आनी पुणेच्या दोगांनी तिका 5 लाख रुपया दिले. ते उपरांत कांय कागदपत्रां घेवन कांय दिसांनी नोकरे खातीर कागदपत्रां तयार जाल्ल्याचें सांगून उरिल्ली रकम दिवपाची मागणी केली. ते प्रमाण कांय रकम थेट जमा केली, तशेंच कांय रकम एका पुलीस कॉन्स्टेबल आशिल्ले व्यक्तीच्या नांवार जिका आपलो भाव अशें ते बायलेन सांगिल्लें ताच्या खात्याचेर जमा केल्ल्याचें कागाळेंत म्हणलां.
सगळे पयशे दिले उपरांत कांय दिसांनी एक मनीस घरा आयलो आनी ताणें वेंचणुकेक लागून नोकरभरतीक कळाव जाता, अशें सांगलें. ते उपरांत ह्या प्रकरणांत कसलीच हालचाल जावंक ना. ताका लागून कागाळ दाखल केल्ल्याचें कागाळदारान सांगलें.
मजगतीं, अशेच तरेन वेगवेगळीं कारणां सांगून ते बायलेन खूब जाणांक तोपी घातिल्ल्याचें उजवाडाक आयलां. बुधवारा खूबश्या जाणांनी पुलिसेंत रितसर कागाळ नोंद करपाची प्रक्रिया केल्या.
ह्या प्रकरणाचो बारीकसाणी तपास करतले, अशें दिवचल पुलीस निरिक्षकान स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
