भांगरभूंय | प्रतिनिधी
दरेक कायदो बायलां वटेन आसा, हांव हाचे आड लढटलों : विकास कुमार
बंगळुरु, खबरां संस्था: बंगळुरु ऑटोमोबायल कंपनींत वरीश्ट पदार काम करपी अतुल सुभाष हांणी बायल आनी तिच्या कुळारान केल्ल्या छळाक बेजारून आत्महत्या केली. आत्महत्या करचे पयलीं अतुल हांणी सुमार एका वराचो व्हिडियो शूट केलो. सुसायड नोटूय बरयली. हाचे उपरांत आतां अतुल सुभाष हांच्या भावान आत्महत्या करपाक मुखार काडिल्ले खातीर अतुल हांची बायल निकिता सिंघानिया आनी तिच्या कुटुंबा आड गुन्यांव नोंद केला. अतुलावेले गुन्यांव फाटीं घेवपाक तीन कोटी आनी भुरग्याक मेळपाक दिवचे खातीर तीस लाख रुपयांची मागणी बायलेन केल्ली, असो आरोप अतुल सुभाष हांच्या भावान केला.
अतुल सुभाष हांणी बंगळुरुच्या मुन्नेकोलाल हांगच्या घरांत आत्महत्या केली. उपरांत ताचो भाव विकास कुमार हांणी अतुल हांची बायल निकिता सिंघानिया, आई निशा, भाव अनुराग आनी काका सुशील हांचे आड मराठाहळ्ळी पुलीस स्टेशनांत आत्महत्या करपाक लायिल्ले खातीर गुन्यांव नोंद केलो. तांचे कडल्यान सेगीत जाल्ल्यो मागण्यांक बेजारून अतुल सुभाष हांणी आत्महत्या केल्ल्याचो आरोप विकास कुमार हांणी केला.
अतुल हे मुळचे उत्तर प्रदेशांतले. तांणी २०१९ वर्सा सॉफ्टवेअर प्रोफेशनल आशिल्ले निकिता हांचे कडेन लग्न केल्लें. मात लग्नाच्या कांय वर्सां उपरांत तीं वेगळीं जाल्लीं. सुभाष हांचे आड खून, हुंड्या खातीर छळ, असैमीक लैंगीक अत्याचार अशे णव गुन्यांव दाखल केल्ले. हातुंतल्या कांय गुन्यांवांनी अतुल सुभाष हांच्या कुटुंबियांचींय नांवां घाल्लीं. सुभाष हांणी आत्महत्या करचे पयलीं २४ पानांची सुसायड नोट बरयल्या. तशेंच ८१ मिनटांचो व्हिडीओय तयार केला. तशेंच उत्तर प्रदेशच्या कुटुंबीक न्यायालयाच्या न्यायाधीशांनी बायलेची बाजू घेतिल्ल्याचोय आरोप केला.
विकास कुमार हांणी कागाळ करतना म्हणलें, न्यायालयीन लढो सुरू जाल्ल्याक म्हजो भाव शरिरीक आनी मानसीक ताणान आशिल्लो. जर फाटल्यो मागण्यो पुराय करूंक ना, जाल्यार तूं मर अशी धमकी तांणी दिल्ली.
माध्यमां कडेन उलयतना विकास कुमार हांणी, जेन्ना भावा आड खंयच्याच पुराव्यां बगर न्यायालयीन खटले दाखल जाले तेन्नाच्यान तो त्रासांत पडिल्लो. फकत न्यायालयाच्या तारखांक हजेरी लावपाक तांणी बंगळुरू ते जौनपूर असो वट्ट ४० वेळा प्रवास केलो. भारतांत दरेक कायदो बायलां वटेन आसा. हांव हाचे आड ठामपणान लढटलों. जातूंत म्हज्या भावाक न्याय मेळटलो आनी समाजांत एक स्पश्ट संदेश वतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
