भांगरभूंय | प्रतिनिधी
पाटणा, खबरां संस्था ः इंस्टाग्राम रिल तयार करपाचे पिशें आनी व्यसन लागिल्ले एके बायलेन आपल्या घोवाचो खून केलो. रिल तयार करपाक ताणें विरोध केल्ल्यान तिणें हें कर्म केलें. बिहारांतल्या बेगूसराय हांगाच्या खोडबंदपूर पुलीस स्टेशनाच्या वाठारांत ही घडणूक घडली.
महेश्वर हांचें लग्न 6 वर्सां पयलीं फाफौत गांवांतल्या राणी कुमारी कडेन जाल्लें. तो कोलकात्यांत मानायपण करतालो. हालींच तो घरा आयल्लो. फाटले कांय दीस ताची घरकान्न राणी कुमारी इंस्टाग्रामाचेर रील तयार करपाक व्यस्त आशिल्ली. तिचो सगळो वेळ रील तयार करपाक वता तें पळोवन महेश्वरान तिका तशें करुं नाका, घरांतलें काम पयलीं कर, अशें सांगलें. पूण राणी आपल्या घोवाचें आयकुपाक तयार नाशिल्ली. हाका लागून दोगांय मदीं झगडी सुरू जाली. तिचो सगलो वेळ फक्त रील करपाक वतालो.
महेश्वराच्या बापायन सांगलें, आयतारा रातीं सुमार णव वरांचेर महेश्वर मावोड्यां गेल्लो. 10.30 वरांचेर म्हजो दुसरो पूत रुदलान फोन करून सांगलें की महेश्वर फोन उखलना. ते उपरांत परत परत फोन केल्या उपरांत दुसऱ्या मनशान ताचो फोन उखललो. मागीर कितें तरी गडबड आसा हें लक्षांत आयलें.
महेश्वराचो बापूय रामेश्वर महेश्वराच्या मावोड्यां गेलो. थंय तांका महेश्वराची कूड दिसली. ताणें पुलिसांक कळयल्लें ताका लागून पुलिसूय थंय पावले. टिकटॉक आनी इंस्टाग्राम रिल करपाक दिवंक नाशिल्ल्यान ताचीच बायल राणी कुमारीन महेश्वराक मारलो असो आरोप रामेश्वर राय हांणी केलो.
इतलेंच न्हय तर महेश्वराच्या बायलेचो अनैतिक संबंद आसा असोय आरोप रामेश्वराच्या कुटुंबान केला. कांय जाणांनी महेश्वराची कूड हॉस्पिटलांत व्हरता अशें सांगून ती लासपाचो यत्न केल्ल्याचोय आरोपूय ताच्या बापायन केला. ह्या प्रकरणांत राणी कुमारीक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
